Анх удаа "FIBA Asia Cup 2025" тэмцээний урьдчилсан шатад шалгарсан Монгол Улсын шигшээ баг эхний тоглолтоо БНХАУ-ын Шиань хотод тус улсын шигшээ багтай хийж 80:49 харьцаагаар хожигдлоо.
Дэлхийн чансааны 29, Азийн чансааны долоод жагсаж буй БНХАУ-ын шигшээтэй хийсэн тоглолтын эхний хагаст манай баг Хятадын шигшээгийн эсрэг төсөөлөөгүй эхлэл буюу долоон оноогоор илүүрхэж өрсөлдөгчөө завсарлага авахаас өөр аргагүйд хүргэсэн билээ. Энэ нь манай улсын шигшээ багийн тамирчдын хэлж байсанчлан “Монголын сагсанбөмбөг хөгжсөн” гэдгийг утгаар нь харуулах шиг болж байв. Гэвч энэ байдал удаан үргэлжлээгүй агаад 31 онооны зөрүүтэй Монгол Улсын шигшээ баг хожигдол амссан юм.
Тэгвэл чансаа өндөр багтай сонирхолтой тоглолт үзүүлж, багаа оноогоор тэргүүлсэн Монгол Улсын шигшээ багийн ахлагч Б.Билгүүний тоглолтын дараах сэтгэгдлийг хүргэж байна.
Б.Билгүүн: Бид нарын хүлээж байсан үр дүнгээс арай өөр үр дүн гарлаа. Миний хувьд БНХАУ-ын өмнөх шигшээ багтай 2011 оноос хойш тэмцээн, уралдаануудад тоглож байсан. Мөн өмнөх тоглолтуудын онооны харьцааг илүү ойртуулахыг хичээлээ. Сандралын хувьд 2011 оноос хойш Хятадтай тоглохдоо Хятадын талбайд тоглож байсан. Энэ тоглолтоос их 20-30 мянган үзэгчтэй Азийн наадмуудад тоглож байсан учраас сандрал гайгүй байсан” гэлээ.