Японы тэрбумтан Хиротаке Яно 80 насандаа таалал төгссөн тухай гэр бүлийнхэн нь даваа гарагт мэдээллээ. Тэрээр зүрхний дутагдлаас болж хоёрдугаар сарын 12-ны өдөр амьсгал хураасан бөгөөд оршуулах ёслол нь гэр бүлийн гишүүд, ойр дотны хүмүүсийн хүрээнд болж өнгөрсөн байна.
Хиротаке Яно нь хямдралтай худалдааны Daiso сүлжээ дэлгүүрийг үүсгэн байгуулагч байсан юм. Тэрээр 100 иений бараа бүтээгдэхүүн худалдаалдаг дэлгүүрийн анхны салбараа 1972 онд нээж байжээ. Дэлгүүрээ нээхээс өмнө Яно нь Чуо их сургуулийг 1967 онд төгсөж, хадам аавынхаа загасны бизнесийг дампуурах хүртэл нь ажиллаж байсан юм. 1972 онд 29 настайдаа Яно нэртэйгээр анхны гудамжны худалдаагаа эхлүүлжээ. Таван жилийн дараа уг дэлгүүрийнхээ нэрийг Daiso болгон өөрчилсөн байна. Энэ нь ямар нэгэн том зүйлийг бүтээх гэсэн утгатай нэр ажээ. Daiso нь 1990-ээд оны үед Японд ихээхэн алдартай болж өдгөө хямдралтай барааны худалдаа нь дэлхий даяар өргөн тархжээ. 2023 оны судалгаагаар Daiso нь Япон улсад 4,360, дэлхий даяар 1,000 орчим дэлгүүртэй болсон байна.
