Сармагчны цэцэг өвчин түгээмэл бүртгэгддэг орнуудаас гадна илрээд буй халдварын батлагдсан тохиолдлын тоо 200-д дөхөж, 100 гаруй сэжигтэй тохиолдол илрээд байгаа талаар Дэлхийн эрүүл мэндийн байгууллага /ДЭМБ/ пүрэв гарагт мэдээлээд, тандалт судалгаагаа сайжруулахыг улс орнуудад уриалжээ.
Камерун, Төв Африкийн Бүгд Найрамдах Улс, Бүгд Найрамдах Ардчилсан Конго Улс, Нигери зэрэг Африкийн орнуудад эндемик болсон сармагчны цэцэг нь хөнгөн хэлбэрийн вируст халдвар юм.
Харин саяхнаас эндемик бус орнуудад тархах болоод байгаа ч ийнхүү тархаж буй омгийн нас баралтын түвшин ойролцоогоор 1 хувьтай байгаагаас гадна үр дүнтэй вакцин, эмчилгээнүүд бий.
Цахим хэвлэлийн бага хурлын үеэр ДЭМБ-ын халдварт өвчний тархвар судлаач Мария Ван Керховегийн хэлснээр, хамгийн сүүлийн мэдээллээр халдвар эндемик бус 20 гаруй оронд илрээд байгаа бөгөөд цаашид энэ тоо нэмэгдэх хандлагатай байна.
“Бид халдварын тохиолдлын тоо цаашид нэмэгдэнэ гэж үзэж байна. Иймд улс орнуудаас тандалт судалгаагаа сайжруулахыг хүсэж байна... Нөхцөл байдлыг хяналтад авах боломжтой байна. Хэдий хэцүү ч эндемик бус орнуудад нөхцөл бадйлыг хяналтад авах боломжтой” гэж тэрбээр ярьжээ.
Montsame.mn