Оросын сөрөг хүчний удирдагч асан Алексей Навальный нас барсныг Ямало-Ненецк дүүргийн Холбооны хорих газраас мэдэгдэв. Тэрээр Хойд туйлын тойргийн Харп тосгон дахь онцгой дэглэмтэй колонид 19 жилийн ял эдэлж байсан юм. Ерөнхийлөгч Владимир Путин улстөрчийн үхлийн талаар ямар нэгэн тайлбар хийгээгүй бөгөөд барууны улстөрчид түүний үхэлд Путиныг буруутгаж байна.
“2024 оны 2-р сарын 16-ны өдөр хорих 3 дугаар колонид Навальныйг явган алхаж байгаад гэнэт ухаан алдаж унасан” гэж мэдэгдэлд дурджээ.
"Тухайн үед колонийн эмч нар яаралтай ирсэн, бас түргэн тусламж дуудсан. Хэргийн газарт ирсэн эмч нар колонийн эмч нарын хийж байсан сэхээн амьдруулах арга хэмжээг хагас цаг гаруй үргэлжлүүлсэн. Гэвч өвчтөн нас барсан” гэж орон нутгийн эмнэлгээс “Интерфакс” агентлаг мэдээллээ.
Түүний эхнэр Юлия Навальная Мюнхений бага хурлын үеэр хэлэхдээ: "Бид зөвхөн Оросын засгийн газрын эх сурвалжаас авсан энэ аймшигт мэдээнд итгэх эсэхээ мэдэхгүй байна. Учир нь та бүхэн үүнийг мэдэж байгаа. Путин болон Путины засгийн газарт итгэж чадахгүй байна. Тэд үргэлж худлаа ярьдаг" гэжээ.
"Гэхдээ энэ үнэн бол Путин, түүний эргэн тойрон дахь бүх хүмүүс манай улс, миний гэр бүл, нөхрийн эсрэг хийсэн хэргийнхээ төлөө хариуцлага хүлээх болно гэдгээ мэдэх ёстой. Энэ өдөр тун удахгүй ирнэ" гэж Юлия Навальная нэмж хэлэв.
"Би дэлхийн хамтын нийгэмлэг, энэ танхимд байгаа бүх хүмүүс, дэлхийн бүх хүмүүст уриалж, бид хамтдаа нэгдэж, энэ бузар мууг ялан дийлж, Орост байгаа аймшигт дэглэмийг ялахыг хүсч байна." гэж үгийнхээ төгснөлд онцолсон байна.
Эх сурвалж: ВВС
