2024 оны хоёрдугаар сарын 16-ны өдрийн 18:00 цагийн байдлаар Баян-Өлгий, Архангай, Завхан, Ховд, Хөвсгөл аймгийн нутгаар хүчтэй цасан шуургатай үзэгдэх орчин хязгаарлагдмал байна. Увс, Булган, Орхон аймгийн нутгаар цас орж байна.
Бусад нутгаар авто замаар зорчих тээврийн хэрэгслийн хөдөлгөөн хэвийн үргэлжилж байна. Шуурхай ажлын хэсгүүд хариуцсан авто замын бэлэн байдлыг хангуулан дараах ажлууд хийгдэж байна. Үүнд:
А14 дугаартай Манхан-Булган-Улсын хил чиглэлд цасан шуургатай. Үзэгдэх орчин хязгаарлагдмал болсон. Аймгийн онцгой байдлын газар болон замын цагдаагийн газартай хамтран хөдөлгөөн хязгаарлаж ажиллаж байна. Зам хариуцагч “Ховд АЗЗА” ТӨХК-ийн Бага улаан давааны шуурхай ажлын хэсэг бүрэн бүрэлдэхүүнээрээ ажиллаж байна.
А0603 дугаартай Цэцэрлэг-Тосонцэнгэл-Нөмрөг, А0604 дугаартай Нөмрөг-Тэс-Арцсуурь боомт, А1102 дугаартай Мөрөн-Улиастай, А18 дугаартай Нөмрөг-Сонгино-Улаангом, А1103 дугаартай Улиастай-Алтай, А16 дугаартай Улиастай-Сархайрхан-Мянгад, А12 дугаартай Баянхонгор-Улиастай чиглэлүүдийн авто замд хүчтэй цасан шуургатай авто замын зорчих хэсгүүдэд хэсэгчлэн шуурч хаагдах нөхцөл байдал үүсч байна. Зам хариуцагч “Завхан АЗЗА” ТӨХК-ийн шуурхай ажлын хэсгүүд тухай бүрт нь онгойлгож хөдөлгөөний бэлэн байдлыг ханган ажиллаж байна.
А0306 дугаартай Өлгий-Цагааннуур-Улсын хил чиглэлийн авто замд хүчтэй цасан шуургатай үзэгдэх орчин хязгаарлагдмал, авто замын зорчих хэсэгт цас ихээр хунгарлагдаж, тээврийн хэрэгслүүд даваагаар давахад хүндрэлтэй байна.
Тус чиглэлийн 42-43 дахь км буюу Зээгтийн даваанд саатсан тээврийн хэрэгслүүдийг даваагаар гаргаж авто замд хунгарласан цасыг зам хариуцагч "Жол" ХХК-ийн шуурхай ажлын хэсэг Авто ачигч-2 бүрэлдэхүүнтэй уртасгасан цагаар цас цэвэрлэх ажил хийгдэж байна.
Авто замчид уртасгасан цагаар ажиллаж байгаа ба хүчтэй шуурганы улмаас цэвэрлэсэн цас буцаж замын зорчих хэсэг дээр ихээр хунгарлаж байгаа тул тус чиглэлийн авто замаар цаг агаар хэвийн болтол зорчихгүй байхыг анхааруулж байна.
Эх сурвалж: Зам тээврийн хөгжлийн төв ТӨҮГ