Чуулганы нэгдсэн хуралдаан үргэлжилж байна. Хуралдаанаар "Зөвшөөрлийн тухай хуулийн нэгтгэсэн төсөл болон хамт өргөн мэдүүлсэн хуулийн төслүүд"-ийн анхны хэлэлцүүлгийг хийлээ.
Энэ үеэр УИХ-ын гишүүн Ё.Баатарбилэг ажлын хэсгээс хэд хэдэн асуулт асуулаа. Тэрбээр, "Одоо төрөөс олгогдож байгаа зөвшөөрлүүдийг өргөн хүрээнд авч үзэж байгаа хууль гэж ойлгож байна. Зөвшөөрөлтэй холбоотойгоор авлига, хээл хахууль гээд төрөл бүрийн асуудлууд гардаг. Тиймээс энэ хууль батлагдвал эдгээр асуудлууд цэгцрэх байх гэсэн хүлээлт байна.
Уг хууль батлагдсанаар тодорхой зөвшөөрлүүд дээр эрсдэл гарах хүндрэлтэй байх вий гэж бас бодож байна. Өмнөх зөвшөөрлөө цуцлаад, дахин бүртгэх, дахин зөвшөөрөл олгох явдал гарах болов уу. Ялангуяа банкны зөвшөөрөлтэй асуудал дээр яаж ажиллах талаар заасан заалт бий юу гэж ажлын хэсгээс асуумаар байна.
Гэхдээ дан ганц банкны асуудал гэлтгүй зөвшөөрөл шинээр олгож байгаа, өмнөх зөвшөөрлүүдийг хүчингүй болгосон шинэ хууль батлагдвал үүнийг дагасан хүнд суртал үүсэх вий гэсэн болгоомжлол байна. Үүнээс яаж урьдчилан сэргийлэх вэ, мөн оочир дарааллыг хэрхэн зохицуулах талаар асуумаар байна" гэлээ.
Үүнд Байнгын хорооны дарга Ж.Ганбаатар хариулт хэллээ. Тэрбээр, "Гол зүйл бол 914 зөвшөөрлийг 448 болгохоор хуйлчилсан байсан. Гэхдээ ажлын хэсэг 377 болгон бууруулсан. Энэ зөвшөөрлүүд дотор хуулиас гадуур журам гаргаад, түүнийгээ зөвшөөрөл болгодог явдлуудыг аль болох хумьсан" гэлээ.