Европын холбооны 27 орон Украинд 50 тэрбум еврогийн санхүүгийн тусламж үзүүлэхээр тохиролцсон гэж Европын зөвлөлийн тэргүүн Чарльз Мишель мэдэгдэв.
"Энэ нь Украинд байнгын, урт хугацааны, урьдчилан таамаглах боломжтой санхүүжилтийг баталгаажуулж байна гээд Европын холбоо Украиныг дэмжих манлайлал, үүрэг хариуцлагыг хүлээнэ. Юу эрсдэлд байгааг бид мэднэ." тэрбээр онцолжээ.
Европын Комиссын Ерөнхийлөгч Урсула фон дер Лейен "Энэ бол Европын хувьд сайхан өдөр" гэжээ.
Украинд 50 тэрбум еврогийн санхүүгийн тусламж үзүүлэх Европын холбоо шийдвэрт Украины Ерөнхийлөгч Владимир Зеленский X сүлжээнд бичихдээ "ЕХ-ны Украинд санхүүгийн дэмжлэгээ үргэлжлүүлэх нь манай урт хугацааны эдийн засаг, санхүүгийн тогтвортой байдлыг бэхжүүлэх болно. Энэ нь Орост үзүүлэх хориг арга хэмжээний дарамтаас дутахгүй чухал" гэж бичжээ.
“Шийдвэрийг нийт 27 орны удирдагч гаргасан нь маш чухал. Энэ нь Европын холбооны хүчирхэг эв нэгдлийг дахин нотолж байна” гэж Зеленский хэлэв.
Өмнө нь Унгарын Ерөнхий сайд Виктор Орбан уг багцыг эсэргүүцэж байсан юм. Польшийн Ерөнхий сайд Дональд Туск Орбаны "хачирхалтай бөгөөд маш хувиа хичээсэн тоглоомыг хүлээн зөвшөөрөх боломжгүй" гэж мэдэгдээд Унгар Европын холбооны бодлогод нөлөөлвөл Украин ялагдана гэж мэдэгдсэн юм.
"Ройтерс" агентлаг Европын дипломатуудаас иш татан мэдээлснээр, Украинд үзүүлэх тусламжийн багцыг жил бүр хэлэлцэх боломжийг тусгасан бөгөөд шаардлагатай бол хоёр жилийн дараа хянан хэлэлцэнэ гэжээ.
Эх сурвалж: ВВС