WGC: Алтны эрэлт өндөр байгаагаас үнэ нь 2200 ам.доллар давж магадгүй байна
2023 онд алтны эрэлт дэлхийн хэмжээнд шинэ дээд түвшинд хүрсэн байна. АНУ-ын Холбооны Нөөцийн банк бодлогын хүүгээ бууруулах магадлал зах зээлд давамгайлж байгаатай холбоотойгоор энэ онд ч эрэлт өндөр байх төлөвтэй байгааг Дэлхийн алтны зөвлөл мэдээллээ. Тухайлбал: Төв банкнуудын алт худалдан авалт нэмэгдсэнээр эрэлт нь 2023 онд гурван хувиар өсөж 4899 тонн хүрсэн байна.
Алтны үнэ 13 орчим хувиар өсөөд байгаа бөгөөд ингэснээр алтны спот ханш унц нь 2200 ам.доллароос давж магадгүй гэж Дэлхийн алтны зөвлөл тооцоолжээ.
Монгол Улсын хувьд Монголбанк 2023 оны 12 дугаар сард 1795 кг үнэт металл худалдан авч, оны эхнээс өссөн дүнгээр 17.86 тонн үнэт металл худалдан аваад байна. Оны эхнээс өссөн дүнгээр Дархан-Уул аймаг дахь Монголбанкны хэлтэс 1961.4 кг, Баянхонгор аймаг дахь Монголбанкны хэлтэс 1106.9 кг үнэт металл худалдан авчээ. Харин алтны экспорт 40 хувиар буурч, 11.7 тонн хүрээд байгаа аж.
