Зээлээ төлсөн ч Монголбанкны хар жагсаалтад орж хохирсон иргэд өнөөдөр мэдээлэл хийлээ.
Б.Жагар болон хуульч нар оролцсон бөгөөд "Зээлээ төлсөн иргэдийн эрх ашиг зөрчигдөж байна. Зээлээ төлсөн ч Монголбанкны хар жагсаалтад байгаа учраас УИХ-ын даргад шаардлага хүргүүлж байна. Зээлийн харилцаанд олон жилээр оролцох боломжгүй болгож байгаа юм.
Зээлээ төлсөн хэрнээ эргээд зээлийн харилцаанд орох боломжгүй болгож байна гэдэг нь нэг ёсондоо зээлийн шоронд хийж байна гэсэн үг. Зээлээ төлсөн иргэд яагаад давхар хуульзүйн давхар шийтгэл аваад байгаа юм бэ. Олон жил ингэж шийтгэх хууль зүйн үндэс гаргалгаа, ээлгүй бодлого байгаа юм бэ. Тиймээс бид нэгдэн нийлж, зээлээ төлж дууссан иргэдийг Монголбанкны хар жагсаалтаас гаргахыг хүсч байна" гэлээ.
Төлөөлөгч Б.Жагар "Гол асуудал гэвэл монголчууд хар жагсаалтад орж, санхүүгийн шоронд хоригдож байна. Нэг хоног зээлээ төлөөгүй учраас шууд хар жагсаалтад оруулж байна.
Нүүрсний хулгай хийсэн гэмт бүлэглэл хуралдаж хуралдаж 3 жил авч байна. Улс орноо тонон дээрэмдсэн бүлэглэлийн толгойлогч нь иймхэн ял авч байна. Хар жагсаалт бол хуулинд байхгүй. Гэтэл иргэдийг санхүүгийн шоронд хийх тушаал гаргадаг эвэртэн туурайтан Монгол банк Сангийн яаманд байна. Нэмэгдэл ял буюу хар жагсаалт гэдгийг гаргаж ирж байгаа нь хууль бус. Иргэнээ хамгаалсан хууль байгаа даа.
УИХ-ын гишүүд болон тэдний хамаарал бүхий этгээдүүд ЖДҮ, Хөгжлийн банкнаас зээл аваад нэг ч хар жагсаалтад ороогүй, нэг ч зээлээ төлөөгүй шдээ. Тиймээс Г.Занданшатар даргаа та Монголбанкны ерөнхийлөгчийг нэн яаралтай дуудаж уулзаад, эдгээр иргэдийг хар жагсаалтаас гаргахыг шаардаж байна" гэлээ.
Иргэн "Манай нөхөр 2016 оны нэгдүгээр сард төрийн байгууллагад ажиллаж байхдаа зээл авсан. Бид хоёр гадаад руу явах болж, орон сууцаа худалдсан юм. Нөхөр бид хоёр 2018 оны есдүгээр сарын 29-нд төлөх хуваарьт өдрөөс ганцхан хоногийн дараа 17 сая төгрөг төлж барагдуулсан. Бид гадаадад хоёр жил амьдарч байгаад ирсэн. Ирээд орон сууц авах гэтэл “Монголбанкны зээлийн хэвийн бус ангилалд оруулсан” гээд зээл гарахгүй байна. Ингэж зээлийн хорионд ороод таван жил хүлээж байна. Банкнаас асуухад хорионоос суллагдахад 10 сарын хугацаа үлдсэн гэж хэлж байна. Бид ингэж удаан хүлээмээргүй байна. Нэг өдрийн өмнө ч гэсэн санхүүгийн шоронгоос гармаар байна" гэв.