НЗДТГ-аас шинэ саарал автобуснуудыг урдаас үе шат дараалалтай оруулж ирсээр байгаа. Өнгөрсөн 7 хоногт гэхэд 50 автобус оруулж ирсэн гэх. Гэтэл Нийслэлд автобусны хүртээмж байхгүйгээс болж иргэд орой өглөөгүй автобус хүлээж автобусны буудал дээр хэдэн цагт зогсч хүлээж байна. Хоёр хоногийн хугацаанд гэхэд автобус ирэхгүй буудал дүүрэн хүмүүс, ирсэн ганц нэгд нь багтахгүй байгаа дүр зураг нийгмийн сүлжээнд тавигдсан юм.
Тэгвэл урдаас оруулж ирээд байгаа шинэ саарал автобуснууд яагаад хангалттай шугаманд явахгүй байгаа юм. Яагаад хуучин автобуснуудаа парклаж, шинэ автобусаар сэлбэхгүй байгаа юм бэ гэсэн шүүмжлэлийг иргэд гаргасаар байна.
Энэ асуудалд түгжрэл хариуцсан сайд Б.Дэлгэрсайхан мэдээлэл өгөхдөө "Оруулж ирсэн шинэ автобуснуудаасаа хувийн компаниудад 115-ыг нь өгчихсөн юм. Эд нар өөрсдөө авахгүй гээд байна. Үнэхээр хэцүү байна. Бараг өөрсдөө шантааж хийгээд байна шүү дээ. Засгийн газрын хурал дээр хувийн хэвшлээ дэмжье. Гэхдээ автобусны мөнгөө өөрсдөө төлөх ёстой гэсэн шаардлагыг хэлж байгаа. Эд нар жижигхэн шантааж хийж байна. Үнэгүй автобус авах гэж байгаа юм.
Өмнө нь авсан автобусны мөнгөө ч төлөөгүй компани байна. Хүний автобус үнэгүй авч ашиг олчихоод дээрээс нь татаас авч байж ийм байж болохгүй шүү дээ. Аль болохоор бид ойлголцоно. Тэд ямар шаардлага тавих уу, бид ямар буулт хийх үү. Асуудлыг шийднэ" гэж ярьжээ.
Харин нийслэлийн удирдлагууд холбогдох сайд дарга нарыг хувийн хэвшлийн автобус компаниудтайгаа ойлголцож, шинээр ирсэн автобуснуудыг яаралтай шугам буюу чиглэлд гаргахыг үүрэгдсэн байна.
