Баянзүрх дүүргийн 26 дугаар хороо Дүнжингаравын уулзварт өнгөрсөн долоо хоногт "Дашваажил" ХХК-ийн газ тээвэрлэж явсан том оврын автомашин Батлан хамгаалах яамны эзэмшлийн Patrol маркийн машинтай мөргөлдсөний улмаас гал гарч, хүчтэй дэлбэрэлт болсон. Энэ хэрэгт том машины жолоочийг цагдан хорьж байгаад сулласан, гадуур байцааж байгаа билээ.
Харин тухайн үед байсан бусад машины жолооч нарыг бусдад болон хэвлэлийнхэнд мэдээлэл өгч болохгүй шүү хэмээн баталгаанд гарын үсэг зуруулж авчээ. Өөрөөр хэлбэл, мөрдөн байцаалтын нууц задалж болохгүй шүү гэж нууцын баталгаа гаргуулсан байна.
Хэрэг мөрдөн байцаалтын шатанд явж байгаа бөгөөд ослын дүгнэлт гараагүй, галын шинжээчид ажиллаж байна гэсэн мэдээллийг өглөө.
