УИХ-ын чуулганы нэгдсэн хуралдаанаар 2023-2024 оны төсвийн хүрээний мэдэгдлийн анхны хэлэлцүүлгийг хийж, Төсвийн байнгын хорооны дарга Ч.Хүрэлбаатар гишүүдийн сонирхсон асуултад хариуллаа.
-УИХ-ын гишүүн Х.Болорчулуун: Ирэх оны төсвийн хүрээний мэдэгдэл, 2023-2025 оны өрийн стратегийг батлах асуудлыг ярьж байна. Монгол Улсын өр 33 тэрбум ам.доллар болжээ. Үүний 10 тэрбум нь Засгийн газрынх, үлдсэн нь хувийн хэвшлийнх гэж байна.Төр хувийнх гэлтгүй энэ чинь бүгд л Монгол Улсын өр шүү дээ. Доллараар төлнө. Өнөөдөр манай улс гаднын өр зээлийн хүүд өдөрт 10 тэрбум төгрөг төлж байна. Энэ үнэхээр том тоо шүү дээ. Өнөөдөр яагаад ийм болчихов. Үнэндээ үүнд парламентад олон жил суусан бүх гишүүн буруутай шүү. Оюу толгойн өр дангаараа гадаад өрийн 60 орчим хувийг эзэлж байгаа. Энэ өрийг тавихгүй байх боломж байсан шүү дээ. Бид өөрсдөө энэ өрийг тавилцахад оролцсон. Зээл авахгүйгээр үйл ажиллагаа явуулах боломж байсан. Хоёрт, бид үйлдвэрлэгч биш хэрэглэгч орон болсны гай л даа.
Ирэх жилүүдэд хэчнээн хэмжээний гадаадын зээл тусламж авах вэ. Хоёрт, 2023 онд хэр хэмжээний зээл төлөх вэ. Түүнийгээ төлж чадах уу, дефолт зарлах хэмжээнд очих юм биш биз дээ?
-Төсвийн байнгын хорооны дарга Ч.Хүрэлбаатар: Монгол Улсын нийт өр 33.2 тэрбум ам.доллар байгаагаас 12.5 тэрбум ам.доллар нь Оюу толгойн төслийн зээл эзэлж байна. Цаашид Засгийн газрын өр нэмэхгүй гэдэгтээ санал нэг байна. Төсвөө алдагдалтай батлаад байвал өр нэмэгдээд л байна. Алдагдалгүй төсөв баталбал өр нэмэхгүй байх боломжтой.
2023 онд 560 тэрбум төгрөгийн гаднын буцалтгүй тусламжаар орж ирэх юм байна лээ. Үүний дийлэнх Мянганы сорилтын сангийн төслийн санхүүжилт юм байна лээ. Мөн хилийн боомтуудын шинэчлэлийн ажлыг буцалтгүй тусламжаар хийхээр тусгасан байна.
2023 онд гадаад өр төлбөрийг төлөхөд ямар нэгэн эрсдэл гарахгүй. Харин дэлхий дахинд бодлогын хүүнүүд өсч байгаа учраас зардал л бага зэрэг өсөх байх. Манай улсын зээлжих зэрэглэл харьцангуй гайгүй байгаа учраас өр төлбөрийг дахин санхүүжүүлэхэд саад гайгүй байх.