55 ба түүнээс дээш насны ахмадуудын нийт хүн амд эзлэх хувийг тооцож үзэхэд 2015 онд 5.7 хувь байсан бол 2021 онд 9.7 хувь болж өссөн байна. Цаашид 2030 онд 11.9 хувь, 2050 он гэхэд таван хүн тутмын нэг нь 60 ба түүнээс дээш насныхан болох тооцоолол гарчээ.
Эмэгтэйчүүд эрэгтэйчүүдээс илүү урт наслах хандлага аль ч улсад байсаар ирсэн. Гэхдээ манай улсын хувьд эрэгтэй, эмэгтэй хүмүүсийн дундаж наслалтын зөрүү хамгийн өндөр орнуудын тоонд ордог.
Тодруулбал 2022 оны байдлаар монгол хүний дундаж наслалт 71.3 гарсан. Үүнээс эрэгтэйчүүдийн дундаж наслалт 67.3, харин эмэгтэйчүүдийнх 76.7 буюу зөрүү нь 9.4 жил.
Эрэгтэй, эмэгтэй настнуудын дундаж насжилтын зөрүү өндөр байгаа нь настны амьдралын чанарт сөргөөр нөлөөлж байгаа юм. Учир нь ганцаар үлдсэн ахмад настнууд амьдралынхаа үлдсэн хугацааг ганцаардал, сэтгэл гутрал, айдас түгшил, орлогын хомсдолтой байдалд өнгөрүүлдэг аж.
