Засгийн газрын хуралдааны шийдвэрийг танилцуулж байна.
Шадар сайд С.Амарсайхан "Өнөөдрийн Засгийн газрын хуралдаанаас гарсан шийдвэрийг танилцуулъя. Нэгдүгээрт, албан үүргээ гүйцэтгэж яваад, өргөсөн тангарагтаа үнэнч зүтгэж, төр ард түмнийхээ өмнө хүлээсэн үүргээ нэр төртэйгөөр биелүүлж яваад амь насаа алдсан Онцгой байдлын байгууллагын алба хаагчдын ар гэрт олгох мөнгөн тусламжийн асуудлыг шийдвэрлэлээ.
Хоёрдугаарт, осол гэмтлийн улмаас түлэгдэж, бэртэл гэмтэл авсан иргэдийн эмнэлгийн төлбөр санхүүжилтийн асуудлыг мөн шийдвэрлэсэн.
Гуравдугаарт, Галд өртсөн 60 айлын орон сууцыг засварлах зардлыг Засгийн газрын нөөц хөрөнгөөс шийдвэрлэнэ.
Дөрөвдүгээрт, Засгийн газраас орон сууцыг засах хугацаанд айл өрхийн амьдрах түрээсийн байрны зардлыг шийдвэрлэнэ.
Тавдугаарт, осол аваар гарсан шалтгаан нөхцөлийг мэргэжлийн байгууллагууд, хууль хяналтын байгууллагууд шалгаж байна. Газ тээвэрлэж явсан машин яагаад бүртгэлгүй байсан бэ гэх асуудал яригдаж байна. Галын машин орох орц, гарцыг шийдвэрлээгүй баригдсан барилгын стандартын асуудал мөн яригдаж байгаа.
Засгийн газрын зүгээс хотын стандарт дүрэм журмыг сахиулах мэргэжлийн гишүүдтэй ажлын хэсэг байгуулагдсан. Энэ ажлын хэсэг стандарт норм дүрэм журмыг бүх шатанд шинэчлэн, мөрдүүлнэ. Шаардлагатай бол олон улсын мэргэжлийн байгууллагаас зөвлөмж авна." гэлээ.
