Цагдаагийн Ерөнхий Газрын Мөрдөн байцаах албаны дарга, хурандаа Н.Мишигдорж ослын газарт хийсэн үзлэгийн талаар мэдээлэл өглөө.
Тэрбээр "Дуудлага мэдээлэл хүлээж аваад цагдаагийн байгууллагаас нийтдээ 189 мөрдөн байцаагч хэргийн газрын үзлэг хийсэн. Мөн Чингэлтэй, Баянзүрх дүүрэг, Тээврийн Цагдаагийн Албаны нийт 31 прокурор, Шүүх шинжилгээний ерөнхий газрын 51 шинжээч хэргийн газрын үзлэгт оролцлоо.
Хэргийн газрын нөхцөл байдлын үнэлгээг түргэн шуурхай хийх зохицуулалтыг хуульд зааснаар авсан. Олон автомашин шатсан, хэд хэдэн барилга байгууламжид гал гарч хохирол учирсан, хэргийн газрын цар хүрээ өргөн байсан учраас мөрдөн байцаагчийн ажлын хэсэг байгуулан ажиллуулснаар тухайн өдрийн 22:00 цагт хэргийн газрын үзлэг дуусаж, зорчих хэсгийг чөлөөлсөн.
Осол гаргасан жолооч нарын хувьд Эрүүгийн хэрэг хянан шийдвэрлэх хуульд зааснаар шүүхийн зөвшөөрөлтэйгөөр 48 цагаар баривчилсан. Үүнээс гадна тухайн жолооч нарын хувьд их хэмжээний хохирол учирсан, 3 хүний амь нас хохирсон хэд хэдэн орон сууцанд гал гарсан учир сэтгэл санааны байдлын хувьд тогтворгүй байсан. Магадгүй өөрийн болон бусдын амь нас эрүүл мэндэд хохирол учруулж болзошгүй нөхцөл байдал үүссэн тул баривчилсан.
Ослын бүх шалтгаан нөхцөлийг тогтоохоор шалгаж байна" гэлээ.
