Засгийн газрын өнөөдрийн хуралдаанаас гаргасан шийдвэрийг танилцуулж байна.
Онцгой байдлын газрын дарга Г.Ариунбуян "Стандарттай холбоотой тээвэрлэлтийн үеийн аюултай химийн хорт бодис юм уу шатах материал тээвэрлэж байгаа машины хувьд стандартын хувьд одоогоор хариулах боломжгүй байна. Уул уурхайн яамны бүтцэд байгаа мэргэжлийн хяналтын байгууллага стандартын хэрэгжилтэд хяналт тавьж ажилладаг. Галд өртсөн "Эдү апарт” орон сууцны 63 айлын 198 оршин суугч байна. Эдгээрээс хэвийн амьдралын горимд шилжүүлэхтэй холбоотой гарах зардал буюу засвар тохижилтын асуудлыг Нийслэлийн Засаг даргын тамгын газраас шийдвэрлэнэ. Байрыг нь засаж байх хооронд иргэдийг түр түрээсийн байранд шилжүүлэхтэй холбоотой ойролцоогоор 1.4 тэрбум төгрөгийн зардал Засгийн газрын нөөц хөрөнгөөс шийдвэрлэж байна. Орон байрыг олох асуудлыг Нийслэлийн тамгын газар хариуцаж, түрээсэж байгаа компани, иргэдтэй гэрээ хийж шилжсэний дараа үе шаттай хэрэгжээд явна.
Шатсан автомашины асуудлыг буруутай этгээдээр төлүүлнэ. "Дашваанжил" ХХК-ийн хуулийн этгээдийн эзэмшилд байгаа автомашин хөдөлгөөнд орох явцдаа ийм эрсдэл учирсан байж болзошгүй гэдэгт хууль хяналтын байгууллага ажиллаж байна. Энэ мөрдөн шалгах ажиллагааны дараа энэхүү этгээдээр төлүүлэх асуудал тодорхой болно. Хамгийн гол нь энэ автомашин нийслэлийн иргэдийн хурлын тогтоолоор баталсан дүрмийг зөрчиж зөвшөөрөлгүйгээр хөдөлгөөнд оролцож байсан гэдэг асуудал яригдсан." гэв.
