Онцгой байдлын алба хаагчдын хувцас хэрэгсэл муу, техник хэрэгсэл дутагдалтай байдгаас болж аливаа нэг осол аваарт улаан нүүрээрээ улаан гараараа ороод эцэстээ амиа алдаж, эрүүл мэндээрээ хохирдог гэсэн мэдээлэл гарсаар байна.
Тэгвэл Онцгой байдлын ерөнхий газраас өнөөдөр алба хаагчдын хувцас хэрэгсэл, стандартын талаар мэдээлэл хийлээ.
ОБЕГ-ын Санхүү хангалт, хөрөнгө оруулалтын газрын дарга, хурандаа Я.Гантөмөр "Онцгой байдлын байгууллагын хувцас хангалтыг техник, хүн нэг бүрийн хамгаалах хэрэгсэл, өдөр тутмын хувцас хэрэгсэл гэж гурав ангилж үздэг. Сүүлийн жилүүдэд техникийн хангалт харьцангуй өндөр чанартай Польш, Беларусь, Франц улсын техникүүдээр тоноглогдож байгаа.
Мөн улсын төсвөөр "Тоёота" маркийн автомашинуудаар парк шинэчлэлийг хийсэн. Хүн нэг бүрийн тусгай зориулалтын багаж хэрэгслийн хувьд улсаас олгосон төсвийнхөө хэмжээнд худалдан авалтаа хийдэг. Алба хаагчдын өдөр тутмын хувцсыг бас төсөвт тусгасан хэмжээгээр нь худалдан авч өгдөг. Чанар стандартын дагуу худалдан авалтыг хийж, мөрддөг тусгай стандарттай.
Галын хувцас хэдэн градусын халуунд тэсвэртэй гэх мэт шаардлагатай. Бид нэг зүйлтэй тулгардаг. Хувцас хэрэгсэл өндөр үнэтэй, чанартай байх хэрээр тоо хэмжээ нь буурдаг. Тийм учраас бид улсынхаа цаг агаарт тохирсон боломжийн үнэтэй хувцас хэрэгсэл авахыг зорьдог "гэлээ.
