Орон нутгийн цагаар 11:00 цагийн орчимд ОХУ-ын Белгород мужид цэргийн тээврийн Ил-76 онгоц осолдсон тухай ОХУ-ын Батлан хамгаалах яамнаас мэдээллээ.
Унасан Ил-76 онгоц Украины Зэвсэгт хүчний олзлогдсон 65 цэргийн албан хаагчийг солилцох зорилгоор Белгород мужид хүргэж явсан бөгөөд мөн онгоцны багийн зургаан гишүүн, дагалдан явсан гурван хүн байсан гэж мэдээнд дурджээ. Онгоц газарт унаж дэлбэрч байгаа бичлэг мөн нийтлэгджээ. Ослын шалтгааныг одоогоор тогтоогоогүй байна.
Харин Украины зарим эх сурвалжийн мэдээлснээр унасан Ил-76 онгоц олзныхныг тээвэрлэж яваагүй, харин агаарын довтолгооноос хамгаалах S-300 системийн пуужин байсан байж магадгүй гэжээ.
Украины Батлан хамгаалах яам онгоцыг Украины зэвсэгт хүчнийхэн сөнөөсөн гэдгийг баталж чадахгүй байна, учир нь тэд "мэдээллийг олж тогтоохоор ажиллаж байна" гэжээ.
Кремль Батлан хамгаалах яамны мэдээлэлд тайлбар өгөхөөс татгалзав. “Энэ бол шинэ мэдээлэл учраас тодорхойгүй байна. Одоо бид үүнийг шалгаж тогтоох болно” гэж ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков мэдэгдэв.
Белгород мужийн захирагч цэргийн нисэх онгоцны сүйрлийн талаар мэдээлээгүй ч телеграм сувагтаа: "Корочанскийн дүүрэгт болсон явдал. Одоогоор ослын газарт Онцгой байдлын албаныхан, мөрдөн байцаах албаныхан ажиллаж байна. Ажлын хуваариа өөрчилчихөөд тэр хавиар явлаа. Бүх нарийн ширийн зүйлийг дараа нь мэдээлнэ" гэжээ.
Ил-76 онгоц Яблонево тосгоноос 5-6 километрийн зайд унажээ. Солилцоо хийж буй бичлэг дээр хоригдлуудыг уулзах газар руу автобусаар хүргэж байгаа нь ихэвчлэн харагддаг. Гэхдээ хэрэв олзлогдсон хоригдлуудыг Оросын нутаг дэвсгэрийн гүнд байрлах цагдан хорих газрууд руу шилжүүлсэн бол тэднийг ямар нэгэн байдлаар хил рүү ойртуулах ёстой.
Солилцооны олзлогдсдыг ихэвчлэн аль болох хурдан хүргэх ёстой байдаг. Тиймээс тэднийг онгоцоор хүргэх нь жирийн зүйл. Энэ удаад ч гэсэн Тюменээс Харьков мужтай хиллэдэг Белгород руу тэднийг нэн даруй хүргэх шаардлагатай байсан байж магадгүй юм.
Эх сурвалж: ВВС