ОБЕГ-ын дарга, хошууч генерал Г.Ариунбуян: БЗД-ийн 26 дугаар хороо Их монгол, Дүнжингарав худалдааны төвийн автозамын уулзвар дээр байгалийн шингэрүүлсэн хий буюу газ тээвэрлэж явсан том оврын автомашин суудлын автомашинтай мөргөлдөж, их хэмжээний гал дэгдэж байна хэмээх дуудлагыг нэгдүгээр сарын 24-ний өдрийн 01:06 цагт хүлээж авсан. Тус дуудлагаар Онцгой байдлын байгууллагын нийслэл дэхь аврах 13 анги, Үндэсний аврах бригад нийт 11 анги салбарын 200 гаруй алба хаагч, 50 гаруй техник хэрэгсэлтэйгээр галын голомтыг унтраах, аюулгүй байдлыг хангах, нүүлгэн шилжүүлэх, хор уршгийг арилгах арга хэмжээг авч ажиллалаа. Ажлын явцад тэрхүү уулзварын зүүн урд байрлалтай Эдү апартмэнт хотхоны 207 дугаар байр, Глобал интэрнэйшнэл сургууль болон уулзварын баруун урд талын Санни таун хотхонд галын голомт дэлгэрсэн. Гал түймэрт өртөж байсан обьектуудыг унтраах, чөлөөлөх арга хэмжээг Онцгой байдлын байгууллагаас шуурхай зохион байгуулж, 03:15 цаг ажиллаж, галын тархалтыг 02:15 цагт бүрэн зосгоож, 04:30 цагт бүрэн унтраалаа. Энэ ажиллагаанд ЦЕГ, Эрүүл мэндийн байгууллага, Нийслэлийн засаг даргын тамгын газар, Ус сувгийн удирдах газар, Улаанбаатар төмөр замын цэрэгжүүлсэн хамгаалалтын алба мөн дулаан хангамжийн байгууллагууд гээд 600 гаруй алба хаагч газар дээр нь 100 гаруй техник хэрэгсэлтэйгээр үүрэг гүйцэтгэж, гамшгийн голомтод үүссэн нөхцөл байдлын хор уршгийг арилгах, ард иргэдийг аюулгүй байрлалд нүүлгэн шилжүүлэх зэргээр Онцгой байдлын байгууллагад дэмжлэг үзүүлж ажилласан гэдгийг тэмдэглэн хэлье.
Энэхүү үүссэн нөхцөл байдлатай уялдан Монгол Улсын шадар сайд, Улсын онцгой комисс газар дээр нь ажиллаж, нэгдсэн удирдлага зохион байгуулалтаар хангаж ажиллан тухайн галын шаталтад өртөж байсан иргэдийг нүүлгэн шилжүүлэх ажиллагааг шуурхай зохион байгуулсан. Эдү апартмэнтад байрлаж байсан 30 иргэн үүнээс 23 том хүн, 17 хүүхдийг БЗД-ийн 13 дугаар хороонд байрлах Күпр зочид буудал руу нүүлгэн шилжүүлсэн. НХХЯ-наас тухайн иргэдийн амьжиргааг дэмжих, мөн буцалтгүй дэмжлэг тусламж үзүүлэх чиглэлээр холбогдох арга хэмжээг авч ажиллаж байна.
Урьдчилсан байдлаар тухайн түймэрт гурван хүн нас барсан. Түлэнхийн төвд 10, Цэргийн эмнэлгийн хордлогын төвд 1, Эх хүүхдийн үндэсний төвд 3 хүүхэд хүргэгдэж, эмнэлгийн тусламж үйлчилгээ авсан.
Галын шалтгааныг урьдчилсан байдлаар дүгнэж үзэхэд байгалийн шингэрүүлсэн хий тээвэрлэн явсан автомашин тойрог дээр хөдөлгөөн үйлдэж байх явцдаа хөдөлгөөнийг зайг анзаарахгүйгээр давхар хий эргэлт хийж, суудлын автомашинтай мөргөлдснөөр ёмкост их хэмжээний шатлага үүсч, галын нөхцөл байдал үүссэн. Энэ дэлбэрэлтийн улмаас Онцгой байдлын байгууллагын БЗД дэхь 63 дугаар ангийн гурван алба хаагч осолд өртөж, 40 метрийн зайтай шидэгдэн харамсалтайгаар амь насаа алдлаа. Алба хаагчдынхаа ар гэр, үр хүүхэд, төрөл төрөгсдөд гүн эмгэнэл илэрхийлье. Цагдаагийн байгууллагаас энэ хэргийн шалтгаан нөхцөлийг тогтоохоор мөрдөн шалгах ажиллагаа хийгдэж байгаа.