Иргэний гар утсыг хулгайлж, доторх мэдээллийг нь ашиглан интернет банкнаас нь мөнгө авсан хэрэг гарчээ.
Тодруулбал, цагдаагийн байгууллагад өчигдөр 14.00 цагийн үед “Гар утсаа алдаад доторх мэдээллээр нь миний данснаас хоёр сая төгрөг авсан байна” гэх дуудлага, мэдээлэл бүртгэгдсэн байна. Тус дуудлага, мэдээллийн дагуу шалгахад Сонгинохайрхан дүүрэгт байрлах ..... худалдааны төвийн ажлын өрөөнөөс 22 настай, эрэгтэй А гэгч нь бусдын гар утас хулгайлж, интернэт банк ашиглан данснаас нь мөнгө шилжүүлснийг шуурхай эрэн сурвалжилж, олж тогтоон, шалгалтын ажиллагааг үргэлжлүүлж байгаа аж.
Иймд иргэдийг гар утас, эд зүйлсээ албан өрөө, бусад газарт ил орхихгүй байх, гар утас, интернэт банкны нэвтрэх нэр, нууц үгээ амархан таах "000000" гэх мэт үг, тоогоор хийхгүй байх, нууцлал задарсан гэж үзсэн даруйдаа нууц үгээ өөрчилж байх, бусдад хувийн мэдээллээ хуваалцахгүй байх, цахим орчинд нэвтрэх нэр, нууц үг, бусад код шаардсан холбоост нэвтрэхгүй, асуумжид хариулахгүй байхыг цагдаагийн байгууллагаас сэрэмжлүүлж байна.
