Монгол Улсын Ерөнхий сайд Л.Оюун-Эрдэнэ Өмнөговь аймгийн Гашуунсухайт боомтод ажиллаж, Гашуунсухайт боомтын төмөр замын шилжүүлэн ачих терминалын бүтээн байгуулалтын нээлтэд оролцлоо.
Терминал ашиглалтад орсноор 10 жилийн хугацаанд 224,6 сая ам.доллрарын орлого олж, улсын төсөвт 17.17 сая ам.долларын татвар төвлөрүүлэн, 8.7 жилд хөрөнгө оруулалтаа бүрэн нөхөж, 58.8 сая ам.долларын цэвэр ашигтай ажиллах тооцоо байна.
Энэ үеэр "Тавантолгой төмөр зам" компанийн захирал Н.Удаанжаргал Тавантолгой-Гашуунсухайт чиглэлийн төмөр замын цогцолбор төслийг ирэх долоодугаар сард ашиглалтад оруулахаар ажиллаж байгаагаа танилцууллаа. Одоогоор төслийн явц 79.5 хувийн гүйцэтгэлтэй байна. Төслийн хүрээнд 174 байршилд хоолой, 15 байршилд дам нуруут болон жаазан гүүр, дэлгэмэл уртаараа нийт 312.8 км төмөр замын дээд бүтэц барихаас 240.5 км-ыг бүрэн дуусгажээ.