Japan Airlines компани ерөнхийлөгчийн албан тушаалд анх удаа эмэгтэй хүнийг томиллоо. Энэ бол дэлхийн хамгийн том агаарын тээврийн компанийн хувьд гэнэтийн алхам болов.
Мицуко Тоттори 1985 оноос тус компанид онгоцны үйлчлэгчээр ажиллаж эхэлсэн бөгөөд сүүлийн хэдэн арван жилийн хугацаанд түүний карьер ихээхэн дээшилжээ.
Мицуко Тоттори ирэх 4-р сарын 1-нд Южи Акасакагийн оронд ерөнхийлөгч болох бөгөөд тэрээр компанийн хамгийн өндөр албан тушаал болох ТУЗ-ийн даргын албан тушаалыг хаших болно.
Токиогийн Ханеда нисэх онгоцны буудалд Airbus A350 эргийн хамгаалалтын онгоцтой мөргөлдсөнөөс хойш хоёр долоо хоногийн дараа тус компанийн удирдлагуудад өөрчлөлт гарч байгаа. Тоттори ерөнхийлөгчийн хувьд түүний ажлын байнгын тэргүүлэх чиглэл нь аюулгүй байдал байх болно гэдгийг онцолсон.
"Онгоцны үйлчлэгчийн хэлтсийн даргаар ажиллаж байсан тэрбээр шинэ томилгоотойгоо холбогдуулан хийсэн хэвлэлийн бага хурлын үеэр "Нислэгийн аюулгүй байдал бол агаарын тээврийн үйл ажиллагааны үндэс. Би энэ зарчмыг тууштай баримталж байгаагаа цаашид ч харуулах болно" гэжээ.
"FlightGlobal"-ын судалгаагаар 2022 оны эцсээр дэлхийн шилдэг 100 агаарын тээврийн компанийн толгой удирдлагад 12 эмэгтэй байгаа ажээ.
Дашрамд дурдахад Жоанна Герагти энэ сарын эхээр JetBlue Airways компанийн гүйцэтгэх захирлаар томилогдсон нь, АНУ-ын томоохон агаарын тээврийн компанийг удирдсан анхны эмэгтэй болсон юм.
АНУ-ын засгийн газар 2030 он гэхэд тэргүүлэгч компаниудын удирдах албан тушаалын гуравны нэгийг эмэгтэйчүүд байлгахаар төлөвлөж байна.
Харьцуулбал, Японд 2021 оны байдлаар эмэгтэйчүүд удирдах албан тушаалын дөнгөж 13.2 хувийг эзэлсэн нь Эдийн засгийн хамтын ажиллагаа, хөгжлийн байгууллагын (OECD) орнуудын дунд хамгийн бага үзүүлэлт юм.
Эх сурвалж: ВВС