Нийтийн тээврийн шинэ маршрутыг өөрчилж, иргэдэд үйлчлээд хоёр хоноод байгаа билээ. Тэгвэл уг маршруттай холбоотой иргэдийн санал гомдол ихээр ирж байгаа тул зарим чиглэлийг хэвээр үлдээхээр болжээ.
Нийслэлийн Засаг даргын хэвлэлийн төлөөлөгч Н.Сугар: Өнгөрсөн хоёр өдрийн хугацаанд иргэдээс 6500 санал гомдол ирсэн гэх мэдээллийг мэргэжилтнүүд өгч байна. Энэ 6500 санал хүсэлтийг хүлээн авч нийтийн тээвэрт хуучин явж байсан 71 чиглэлийг сэргээх шийдвэр гарсан. Энэ нь нийт зорчилтын 35 орчим хувийг зохицуулдаг чиглэл байгаа. Үлдсэн 65 чиглэл буюу гол зургаан чиглэл, холын 15 чиглэл, үндсэн 12 чиглэлийг хэвээр үлдээж байна. Өөрөөр хэлбэл, нийтийн тээврийн маршрут чиглэлийн шинэчлэлийн 65 хувь нь хэвээр үлдэж, 35 хувийг сэргээх шийдвэрийг мэргэжилтнүүд гаргаж байна. Энэхүү шийдвэрийг гаргаж байгаа шалтгаан нь эдгээр чиглэл дээр маш олон иргэний санал гомдол ирсэн тул өөрчлөлт хийх нь иргэдийн хэрэгцээ шаардлагад нийцэх юм байна. Мөн энэ чиглэлд явах нийтийн тээврийн тоо хэмжээ хэвэндээ байгаа гэлээ.