УИХ-ын намрын чуулган завсарлахаас өмнө нийслэл гаднын бонд босгох эрхээ авсан.
Өрийн удирдлагын тухай хуулиар Засгийн газар энэ жил гурван их наяд төгрөгийн бонд босгох буюу өр тавих эрхтэй болсон билээ. Үүний 500 тэрбумыг нийслэл бие даан гаргах эрхийг УИХ өглөө.
Нийсэл гаднын зах зээл дээр бонд гаргаж 20 мянган айлын орон сууц барина гэдгийг Засаг дарга Х.Нямбаатар хэлж буй. Тэрээр “2024 оны бүтээн байгуулалтын улиралд 20 орчим мянган айлын орон сууц барихаар төлөвлөж байгаа. Улаанбаатар хотын төв талбайгаас хойш 1.7 км зайд байгаа дэд бүтэц нь шийдэгдсэн Сэлбэ дэд төвийн 160 га газарт төлөвлөлт хийгээд ажлын зураг, ТЭЗҮ-г нь боловсруулуулахаар тендер зарласан. Энд ойролцоогоор 12 мянган айлын орон сууц барина. Ингэснээр 32-ын тойргоос хойших 12 мянган айлын газрыг орон сууцаар солино. Ингэснээр 701 орчим га газрыг 2025, 2026 онд чөлөөлнө. Үүнийг хэрэгжүүлж чадсан тохиолдолд Улаанбаатар хотын нийт гэр хорооллын дөрөвний нэгийг төлөвлөлтийн дагуу оронсууцжуулах болно. Цогцоор нь ингэж шийдвэрлэхгүй бол одоо 2-3 айлын газрыг чөлөөлж төлөвлөлтгүй хоёр орон сууц барчихаад "За боллоо" гээд сууж байгаа.
Мөн Уур амьсгалын өөрчлөлтийн сангийн 95 сая ам.долларын санхүүжилт болон бусад эх үүсвэрээр СХД-т 6000 айлын орон сууц барина. Одоо 200 нь баригдаад дуусаж байгаа.
Сэлбэ дэд төвийн 2003 айлын газрыг чөлөөлөх ажлын хэсэг байгуулсан. Энэ ажлын хэсэг айлуудтай хэлэлцээ хийж байгаа. Үүнтэй холбоотойгоор айлуудыг нүүлгэх болон түрээсийн орон сууцанд оруулах, бэлэн орон сууц худалдан аваха зардлыг 2023 оны төсөвт суулгачихсан байгаа" гэсэн юм.
Нийслэл бонд гаргахад Засгийн газар баталгаа гаргаж өгч байгаа бөгөөд хэрвээ нийслэл өрөө төлж чадахгүй бол Засгийн газар төлнө. Өөрөөр хэлбэл, нийслэлийн нэр дээр бонд гаргаж байгаа ч энэ Монгол Улсын л өр.
Манай улсын зээлжих зэрэглэл хангалттай өндөр биш байгаа учраас бонд босгоход хүү өндөр байна. Нийслэл бондоо Засгийн газрын бондын хүүтэй ижил хүүтэй босгоно гэдгийг Х.Нямбаатар дарга хэлж буй. Тэгвэл Засгийн газрын оны өмнө босгосон “Сенчири 3” бонд 7.875 хүүтэй. Тиймээс нийслэлийн бондын хүү ч энэ хэмжээнд байх бололтой. Гэхдээ төр өр тавьж, барилга барьж байхын оронд хувийн хэвшилтэйгээ тохироод, газрыг нь чөлөөлж өгөөд хямд үнээр иргэдийг орон сууцжуулах боломж бий. Төр бүх бизнест оролцлоо, үүнийгээ болъё гэдэг ч нөгөө гараараа байшин барилга руу хүртэл орох шийдвэрийг гаргалаа. Манай улсын ДНБ-ий 80 орчим хувийг төр бүрдүүлж байна. Өөрөөр хэлбэл, бүх салбар руу төр орж, хувийн хэвшлийнхэн ажиллах боломжгүй болсон гэхэд хэлсдэхгүй. Үүнд нийслэл ч хувь нэмрээ оруулах нь.