УИХ-ын чуулганы өнөөдрийн /2022.05.26/ нэгдсэн хуралдаанаар Монгол Улсын Ерөнхийлөгчөөс 2022 оны 05 дугаар сарын 20-ны өдөр өргөн мэдүүлсэн, "Хүнсний хангамж, аюулгүй байдлыг хангах талаар авах зарим арга хэмжээний тухай" Монгол Улсын Их Хурлын тогтоолын төслийг хэлэлцлээ.
Энэ үеэр УИХ-ын гишүүн Д.Сарангэрэл "Уг төсөл бол нэг талаас хүнсний хангамж, нөгөө талаас аюулгүй байдлыг хангах талаарх асуудал байгаа. Аюулгүй байдал талаас нь хүнсний хангамжийг Монгол хүний эрүүл мэндтэй шууд холбож үзэх хэрэгтэй.
Хэрэв бид хүнсний хангамжийн тогтоолыг сайн хэрэгжүүлбэл, иргэдийхээ эрүүл мэндийг хамгаалах чиглэлд дэвшил гарах боломжтой.
Түүнээс гадна хангамжийн асуудал дээр бид Ковид-19 болон дайны нөхцөл байдалтай холбоотойгоор НҮБ-ийн ХХА-н байгууллагаас гаргаж байгаа мэдээллүүдийг онцгойлон анхаарах шаардлагатай" гэлээ.