УИХ-ын чуулганы өнөөдрийн /2022.05.26/ нэгдсэн хуралдаан үргэлжилж байна. Хуралдаанаар "Монгол Улсын хөгжлийн 2023 оны төлөвлөгөө батлах тухай" УИХ-ын тогтоолын төслийн эцсийн хэлэлцүүлэг явагдаж байна.
Төслийг эцсийн хэлэлцүүлэгт бэлтгэсэн талаарх ЭЗБХ-ны танилцуулгыг УИХ-ын гишүүн Ш.Чинзориг танилцууллаа.
Тэрбээр, "Монгол Улсын хөгжлийн 2023 оны төлөвлөгөө батлах тухай УИХ-ын тогтоолын төслийг боловсруулахдаа, Төр, хувийн хэвшлийн түншлэл болон зээл тусламжийн хөрөнгөөр санхүүжүүлэхээр тусгасан төсөл арга хэмжээнд шаардагдах бэлтгэл хангаж ажиллах, цаашид улсын хөгжлийн төлөвлөгөөний төсөл боловсруулахдаа, хөгжлийн бодлогын тэргүүлэх салбар, чиглэлийг тодорхойлох, хөгжлийн төсөл арга хэмжээг эрэмбэлэн тусгах, түүнчлэн тухайн жилийн төлөвлөгөөнд тусгагдсан төсөл арга хэмжээний гүйцэтгэлээр Засгийн газрын үйл ажиллагааны хөтөлбөрийн зорилт бүрийн хэрэгжилтийг үнэлэх боломжтойгоор төлөвлөгөөний төслийг боловсруулахыг Засгийн газарт даалгасан заалт нэмсэн.
Мөн төслийн хавсралтад:
- Ажлын байрыг нэмэгдүүлэх
- Халамжаас хөдөлмөрт шилжих оновчтой бодлого хэрэгжүүлэх
- Өрийн менежментийг сайжруулах
- Уул уурхайн түүхий эдийн боловсруулалтын төвшин, үнэ цэнийг нэмэгдүүлэх
- Хүнсний хангамж, аюулгүй байдлыг хангах талаар төлөвлөгөө боловсруулж, хэрэгжүүлэх
- ХАА-н гаралтай, түүхий эдэд суурилсан нэмүү өртөг шингэсэн бүтээгдэхүүний үйлдвэрлэлийг хөгжүүлэх асуудлыг холбогдох зорилтод нэмж, төслийн хавсралтад тусгагдсан зарим төсөл, арга хэмжээний нэрийг өөрчилж, банк санхүүгийн зах зээлийг өргөжүүлж, оновчтой тогтолцоог бэхжүүлэх, эрх зүйн орчныг бүрдүүлэх, хөгжлийн санхүүжилтийг нэмэгдүүлэх, шинэ суурьшлын бүс, чөлөөт бүсийн хөгжлийн төлөвлөгөөг боловсруулах асуудлыг тусгасан болно" гэлээ.