- Ерөнхий сайд Л.Оюун-Эрдэнийн танхим өнгөрсөн гурван жилд авлигатай тэмцэх чиглэлээр ямар ажлууд хийв?-
№1 Улстөрчдийн гэр бүл, ах дүүс төсвийн мөнгө цөлмөж, хөлждөг асуудлыг хуулиар хязгаарлалаа
Улстөрчид төрийн албыг мөнгөний машин болгож, хамаатан садан, найз нөхдөдөө төсөв, тендер авч өгдөг, хууль бусаар хөлждөг асуудалд цэг тавих эхлэл тавигдлаа. Яг ийм хатуу зохицуулалтуудыг тусгасан хуулийн заалт энэ оны нэгдүгээр сарын нэгнээс хэрэгжиж эхэллээ. Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулсан нь Л.Оюун-Эрдэнийн Засгийн газрын өнгөрсөн гурван жилд санаачилсан Авлигатай тэмцэх цогц хөтөлбөрийн нэг хэсэг байсан юм.
Одоогоос яг нэг жилийн өмнө буюу 2023 оны нэгдүгээрсард Улаанбаатар төмөр замын тээвэр зохицуулалтын албаны дарга С.Батдөлийг авлигын хэргээр шалгаж, түүний гэрээс нийт 10 тэрбум төгрөгийн бэлэн мөнгө, эд зүйлсийг хуулийнхан хураан авсан. Төрийн албан хаагчийн гэрээс бүхэл бүтэн сэйфтэй мөнгө илэрч, олон нийтийг бухимдуусан. Яг үүнтэй зэрэгцээд Ерөнхий сайд Л.Оюун-Эрдэнэ санаачилга гаргаж Нийтийн албанд нийтийн болон, хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлтийнтөслөө УИХ-д өргөн барьж, улмаар парламентын хаврын чуулганаар батлуулсан юм.
УИХ-ын гишүүд, эрх бүхий албан тушаалтнууд ЖДҮХС, Тариалан эрхлэлтийг дэмжих сан зэрэг тусгай сангуудыг тонож, хамаарал бүхий этгээддээ авч өгсөн хэргүүд сүүлийн хэдэн жилд олон нийтэд ил болсон. Иймээс ч төрийн алба гэдэг хууль бусаар мөнгө идэж, баяжих хэрэгсэл биш гэдгийг хатуу сануулж, чанга хуулийн зохицуулалт бий болгох ёстой гэж Засгийн газар үзэж байна. Тухайлбал, энэ хүрээнд УИХ-ын гишүүд, сайд дарга нар, тэдний хамаарал бүхий этгээдүүд алба хаших хугацаандаа тендер, хөнгөлөлттэй зээл, тусламж, батлан даалтад хамрагдахыг хориглосон юм.
Б.БАЯРСАЙХАН: УЛС ТӨРД НӨЛӨӨ БҮХИЙ ЭТГЭЭДИЙН НӨХӨР, ЭХНЭР, ХҮҮХЭД НЬ ДАВУУ ЭРХ ЭДЭЛДЭГ БАЙДЛЫГ ХУУЛИАР ХАЛСАН
Хуульд нэмэлт өөрчлөлт оруулах нь ямар ач холбогдолтой талаар АТГ-ын Мэдүүлгийн бүрдүүлэлт, дүн шинжилгээний албаны дарга Б.Баярсайханаас тодрууллаа.
.jpeg)
Тэрээр “Өнгөрсөн 2023 онд сонирхлын зөрчлийн хуульд томоохон өөрчлөлт орууллаа. Энэ өөрчлөлтөөр улс төрд нөлөө бүхий этгээд буюу Ерөнхийлөгч, УИХ-ын дарга, Ерөнхий сайд, УИХ-ын гишүүд, Аймаг, Нийслэлийн засаг дарга, тэдгээрийн эхнэр, нөхөр, хүүхдүүдийн тодорхой үйл ажиллагаа эрхлэхийг хязгаарласан. Үүнд:
1. Дээр дурдсан албан тушаалтнуудын эхнэр, нөхөр, хүүхдүүд нь төрийн өндөр дээд албан тушаал хашихгүй.
2. Мөн төрөөс олгож буй хөнгөлөлттэй зээл тусламж, хөтөлбөрт хамрагдахгүй.
3. Гуравдугаарт, дээр дурдсан албан тушаалтнууд, эхнэр, нөхөр, хүүхдүүдийн эзэмшлийн ААН төрөөс зарласан тендер, сонгон шалгаруулатад оролцохыг хориглосон.
Үүнийг нэг талаас харахад хүний эрхийг хязгаарласан мэт байж мэднэ. Гэхдээ эдгээр албан тушаалтнууд нь нийтийн ашиг сонирхлын төлөө хэмээн тангараг өргөдөг. Түүнчлэн, мэдээлэлд ойр байдаг хүмүүс юм. Тиймээс хуулийн ийм хязгаарлалт хийж, төрийн албанд итгэх итгэлийг сэргээх ач холбогдолтой хуулийн өөрчлөлтийг бид хийж чадсан.
Хуулийг зөрчсөн тохиолдолд албан тушаалын хариуцлагын асуудал ярина. Мөн тендерт шалгарсан тохиолдолд түүнийг нь хүчингүй болгох, хохирсон учирсан бол нөхөн төлүүлэх зэрэг зохицуулалт хуульд туссан.
АТГ-ЫН ДЭРГЭДЭХ ОЛОН НИЙТИЙН ЗӨВЛӨЛИЙН ДАРГА Г.ГАНБАТ: АВЛИГАТАЙ СИСТЕМИЙН ХЭМЖЭЭНД ТЭМЦЭХ НЬ ЧУХАЛ
30 жилд бугшсан авлигын тэмцэх, торон сүлжээг нь задлах амаргүй хэмээн Ерөнхий сайд Л.Оюун-Эрдэнэ УИХ-ын чуулганы үеэр мэдэгдэж, системийн хэмжээнд тэмцэл өрнүүлэхээ зарласан. Үүнтэй санал нэг байгаа гэдгээ АТГ-ын дэргэдэх Олон нийтийн зөвлөлийн дарга Б.Ганбат илэрхийлж байна.
.jpeg)
Тэрээр “Засгийн газарт авлигатай тэмцэх хүсэл эрмэлзэл, санаачилга байна. Гэхдээ үүнийгээ илүү далайцтай болгох чухал. Авлигатай тэмцэх үндэсний хөтөлбөр хэрэгжээд эхэллээ. Бодлого сайн хэрэгжихийн тулд олон нийтийн оролцоо, дэмжлэг маш чухал. Авлигын асуудал маш ноцтой түвшинд хүрснийг бид хүлээн зөвшөөрөх ёстой” гэсэн юм.
ИРГЭД: БАТАЛСАН ХУУЛИА ХЭРЭГЖҮҮЛЭХ Л ХЭРЭГТЭЙ
Ерөнхий сайд Л.Оюун-Эрдэнийн танхимын авлигатай тэмцэх ажлуудын талаар иргэдийн байр суурийг сонслоо.
Олон нийтийн тухайд “Хуулиа чангалж байгаа нь зөв. Хамгийн гол нь баталсан хуулиа хэрэгжүүлэх чухал. Авлигатай тэмцэнэ гэдэг бол үр хүүхэд, орныхоо ирээдүйн төлөө тэмцэнэ гэсэн үг. Үүнийг ухамсарлаж, нийтээрээ оролцоо сайтай байх хэрэгтэй” гэсэн байр суурийг илэрхийлсэн юм.
