Эдийн засгийн хөгжлийн сайд Ч.Хүрэлбаатар Хөрөнгө оруулалтын тухай хуулийн шинэчилсэн найруулгын төслийн талаар өнөөдөр мэдээлэл хийлээ. Тодруулбал, энэхүү хуулийн төслийг эсэргүүцэж Ерөнхийлөгч асан Х.Баттулга өнөөдөр УИХ-ын дарга Г.Занданшатарт шаардлага хүргүүлсэн. Өөрөөр хэлбэл, нам гүм байсан тэрбээр ийн ил гарч ирлээ.
Харин түүний шаардлагын хариуд сайд Ч.Хүрэлбаатар "Өнгөрсөн оноос эхэлж над руу чиглэсэн гүтгэлгийг зохион байгуулж ирсэн. Ч.Хүрэлбаатар бол Хятадын эрлийз гэсэн гүтгэлгийн мэдээллийг тараасан. Гадаадын хөрөнгө оруулалтын тухай хуулиар Ч.Хүрэлбаатар гадаадынханд 100 жилээр газар олгох гэж байна гэх мэтийн гүтгэлгийн шинжтэй мэдээлэл гарсныг та бүхэн мэднэ. Энэ бүгдийг зохион байгуулж байгаа эзэн нь өнөөдөр гарч ирлээ. Эзэн нь хэвлэлийн бага хурал хийлгэж байна. Энэ хуулийг хэлэлцүүлэхгүй байлгахын талаар хурлын даргад хандаж байх шигээ. Өмнө нь Х.Баттулгаас долоон удаа хориг авч байсан. Ерөнхийлөгч биш байж одоо найм дахь хориг ирж байх шиг байна" гэв.
