Нийтийн тээврийн компаниуд зардлаасаа хэд дахин бага үнээр иргэдэд үйлчилж, алдагдлаа татаасаар нөхөж ирсэн нь энэ салбар дэлхийн жишгээс хэдэн арван жилээр ард хоцрох шалтгаан болсон гэдэгтэй олон хүн санал нийлэх болж. Нөгөө талд, энэ бол нийтийн тээврийн мафийг дагасан авлига, нийслэлийн үе үеийн сэтгэлгүй түшмэлүүдийн ажлын үр дүн гэж тайлбарладаг. Аль ч талаасаа үнэний ортой. Эцэстээ нийтийн тээврийн салбар “дампуурсан” болохын нотолгоо нь -30 хэмийн хүйтэнд цонхоор нь салхи сийгсэн битүү чихсэн хуучин солонгос автобуснууд хар утаа хаясаар Улаанбаатарын түгжрэл дунд зогсоо дүр зураг билээ. Хамгийн сүүлд, автобусаар нэг удаа зорчих төлбөр 1350 төгрөг болж байж нийтийн тээвэр алдагдалгүй ажиллах боломжтой гэх тооцооллыг хийсэн байна.
Тэгвэл Нийслэлийн Засаг дарга бөгөөд Улаанбаатар хотын захирагч Х.Нямбаатар ажлаа авсныхаа дараа нийтийн тээврийн салбарт цогц өөрчлөлтийг зоригтой хийхээ илэрхийлсэн. Тухайлбал, нийтийн тээврийн алдагдлыг бууруулах зорилгоор автобусаар зорчих үнийг 1000 төгрөг болгох талаар оны өмнө мэдээлж байв.
Энэ дагуу автобусны төлбөрийг 1000 төгрөг болохоор төлөвлөж байгаа аж. Ингэхдээ зорчигч нэг удаа төлсөн 1000 төгрөгөөр 4 удаа зорчих боломжтой. Энэ нь Улаанбаатарт өдөрт 2.8 сая зорчих хөдөлгөөн хийгддэг гэх судалгааг үндэслэжээ. Өөрөөр хэлбэл, зорчигч эхний удаа автобусанд суухдаа смарт картаа уншуулж 1000 төгрөг төлөөд цааш 3 удаа картаа дахин уншуулж үнэгүй дамжиж зорчих юм. Харин өдөрт дөрвөөс олон удаа автобусаар зорчсон тохиолдолд дахин 1000 төгрөг төлөх зарчмаар иргэд нийтийн тээврээр үйлчлүүлнэ.
Гэхдээ ахмад настан, хөгжлийн бэрхшээлтэй иргэд болон хүүхдүүд үнэгүй зорчсон хэвээрээ байх бөгөөд оюутнуудын хувьд 2024 оныг дуустал автобусаар үргэлжлүүлэн үнэгүй зорчих юм. Харин үнэгүй зорчдог иргэд өдөрт дөрвөөс олон удаа зорчсон тохиолдолд мөн 1000 төгрөг төлж зорчино.
Мөн эмнэлэгт үзүүлэх зэргээр орон нутгаас түр хугацаанд ажлаар ирсэн ахмад настан заавал автобусны карт авч нийтийн тээврээр үйлчлүүлнэ. Орон нутгийн ахмадууд Улаанбаатарт нийтийн тээврээр үнэгүй зорчсон төлбөрийг тухайн аймаг, орон нутгийн захиргаанаас нийслэл нэхэмжилж авдаг болох аж.
Түүнчлэн өнгөрсөн онд 400 гаруй автобусаар парк шинэчлэл хийсэн бол сүүлд худалдаж авсан 600 автобус хоёрдугаар сарын 4-ний өдөр гэхэд бүрэн ирж дуусна. Улмаар нийтийн тээврийн маршрут, иргэдийн зорчих хөдөлгөөн, замын ачааллын өгөгдөл, судалгааг үндэслэн автобусны чиглэлийг богино маршрутаар явуулахаар төлөвлөсөн байна.
Ингэхдээ Төв талбай орчимд автобусны төв зогсоол байгуулж, босоо болон хэвтээ тэнхлэгийн хөдөлгөөнийг богино маршрут болгож өөрчлөхөөр төлөвлөж байгаа аж. Жишээ нь, босоо тэнхлэгийн хөдөлгөөнд хойд талаасаа эхний богино маршрут нь Зунжин худалдааны төв-7 буудал, хоёр дахь богино маршрут 7 буудал-Төв талбай. Хэвтээ тэнхлэгийн хөдөлгөөнд Амгалан-13-р хороолол, 13-р хороолол-Төв талбай гэх зэргээр нийтийн тээврийн маршрутад өөрчлөлт орно. Ийнхүү нийтийн тээвэр богино маршрутаар үйлчилдэг болсноор иргэд автобус хүлээж зогсох цаг хэмнэгдэх, цаашид маршрутыг илүү оновчтой, иргэдэд чирэгдэлгүй байлгах боломж бүрдэх юм.