УИХ дахь АН-ын бүлэг ээлжит хуралдаанаа хийж, хурлаар хэлэлцсэн асуудлын талаар мэдээлэл хийлээ.
УИХ дахь АН-ын бүлгийн дарга О.Цогтгэрэл "Өнөөдрийн хуралдаанаар УИХ-ын сонгуулийн тухай хуулийн талаар СЕХ-ны мэдээлэл сонсож, ногоон автобусны асуудлаар хяналт шалгалтын түр хороо байгуулах тогтоолын төслийн талаар хэлэлцлээ.
Ногоон автобусны асуудлаар хяналт шалгалтын түр хороо байгуулах тогтоолын төслийг дэмжиж 25 гишүүн гарын үсэг зурсан ч хэлэлцэх асуудлын дараалалд оруулахгүй байна. Уг нь 19 гишүүн дэмжвэл хэлэлцэх асуудалд шууд оруулна гэж хуульд заасан байдаг. Эрх баригчид ковидын үеийн төсөв, ногоон автобусны асуудлыг аль нэг нам руу чихэх боломжгүй учраас сонсгол явуулахгүй байх хуулийн нугалаа гаргаж байна.
Өмнө нь Хөгжлийн банк, нүүрсний асуудлыг сөхөж бусад руу чихэх, улс төр хийх ажлыг л эрх баригчид хийлээ. Ирэх 7 хоногт чуулган завсарлахаас өмнө энэ хоёр асуудлыг заавал шийдэхийг АН-ын бүлэг шаардаж байна. Хэрвээ шийдэхгүй бол УИХ-ын дарга Г.Занданшатар болон түр хороо байгуулах ёстой Төрийн байгуулалтын байнгын хорооны дарга Н.Энхболд нарыг Үндсэн хуулийн Цэцэд өгнө.
УИХ-ын хяналт шалгалтын тухай хууль дээр 19-ээс дээш гишүүн дэмжсэн бол дараалал харгалзахгүйгээр нэн даруй шийдэж, түр хороог заавал байгуулах ёстой" гэлээ.
УИХ-ын гишүүн Ц.Туваан "Монгол улсын нутаг дэвсгэрийн 80 хувь нь цасан бүрхүүлтэй болж, өвөлжилт хүндэрлээ. Урин цаг яагаа ч үгүй байгаа энэ үед өвс, ногоон тэжээлийн үнэ өссөн байна. Тиймээс хөдөө аж ахуй газар тариалан мал аж ахуй руу чиглэсэн бодлого явуулахгүй бол хавар маш олон толгой мал хоргодох эрсдэл үүсээд байна. Зам даваа гаргамаар байна. Газар тариалангийн бүс нутагт зарагдаагүй байгаа улаанбуудай байна. Үүгээр тэжээл хийж малчдаа хангах боломж байна. Төр засаг импортлох асуудлыг ярьж байхаар боловсруулж дотоодын асуудлаа шийдэхэд анхаарах хэрэгтэй байна" гэв.
