АНУ-ын зохих албаны эх сурвалжийн мэдээлснээр, өнгөрсөн 2021 онд тус улсад төрөлтийн тоо нэмэгдсэн бөгөөд сүүлийн долоон жилийн хугацаанд анх удаа нэмэгдсэн тохиолдол болсон байна.
Тодруулбал, тус улсын Өвчний хяналт, урьдчилан сэргийлэх төвийн харьяа байгууллага болох Үндэсний Эрүүл мэндийн статистикийн төвийн мэдээлснээр, өнгөрсөн онд АНУ-д 3.66 сая хүүхэд шинээр мэндэлсэн нь өнгөрсөн оноос 1 хувиар өссөн үзүүлэлт болжээ.
Төрсөн эхчүүдийг насны хувьд авч үзвэл 25 ба түүнээс дээш насны эмэгтэйчүүдийн төрөлтийн түвшин бүх насны бүлэгт өссөн байна.
Тус улсын хувьд төрөлтийн тоо 2007 онд оргилдоо хүрч байсан ба мөн оны сүүлээр эдийн засгийн уналтад орсны дараа төрөлтийн хэмжээ огцом буурсан. Үүнээс хойш 7 жилийн хугацаанд энэ үзүүлэлт тасралтгүй буурсаар иржээ.
Өнгөрсөн 2020 онд тус улсын нэг эмэгтэйн амьдралынхаа туршид төрүүлэх хүүхдийн дундаж тоо 1.64 байсан бол 2021 онд 1.66 болж нэмэгдсэн байна.
Хоёр мянга хорин оны 1.64 гэсэн үзүүлэлт нь тус улс 1930-аад оноос энэ төрлийн статистикийг хөтлөж эхэлснээс хойших хамгийн доод үзүүлэлт болж байжээ.
Montsame.mn