Монгол Улсад 2023 онд 35 мянган гэмт хэрэг бүртгэгдсэн. Үүний 16 мянга нь кибер орчинд үйлдэгджээ. Энэ гэмт хэргийн улмаас нийт 140 тэрбум төгрөгийн хохирол учирсан байна. Гэмт хэргийг 7142 хүн үйлдсэн бөгөөд 8294 хуурамч аккаунт ашиглажээ.
Энэ төрлийн гэмт хэргийн талаар Кибер гэмт хэрэгтэй тэмцэх газрын чиглэлийн ахлах мөрдөгч, цагдаагийн хошууч Б.Энхзаяа “Нийт 2.3 сая фэйсбүүк хэрэглэгчээс 1.9 сая нь цахим хаягаа өдөр тутамд идэвхтэй ашигладаг. Харин 400 гаруй мянган хаягийг гэмт хэрэг үйлдэх санаа, сэдлээр нээсэн хаяг байж болзошгүй байна.
Залилах гэмт хэргийн түгээмэл хэлбэр нь фэйсбүүк хаягаа алдсаны улмаас эргэн тойрны хүмүүс рүү нь мөнгө зээлээч гэж хуурамч зурвас илгээж, тухайн хүмүүс нягталж шалгахгүйгээр мөнгө илгээж хохирдог. Мөн “Зээл гаргаж өгнө”, “Гэртээ суудаг хүмүүст өдөрт 50 мянган төгрөгийн цалинтай ажил байна” гэх мэт холбоосыг илгээдэг. Энэ зарын дагуу хүмүүс утасны дугаараа, фэйсбүүк, и-мэйл хаягаа бичдэг. Мөн овог нэр, регистрийн дугаар, нууц үг зэргээ оруулаад өөрийн хувийн бүх мэдээллээ алдчихдаг” гэлээ.
