Сүүлийн үед үндэсний бөхийн спортыг дэндүү сонирхолтой болгож байгаа нэг хүчтэн бий. Тодруулбал, Булган аймгийн Сэлэнгэ сумын харьяат Улсын начин Д.Амарсайхан юм. Бөхийн хорхойтнууд бөхчүүд Амаргүй Амараа начныг барилдааныг аатай шартай байдлыг нь ам булаалдан ярьж байна. Сэдэв болгоны гол дүр Амарсайхан начин болчихоод байгаа юм. Тиймээс ч түүнийг спортын сэтгүүлчид урьж залж ярилцлага авч, Ховд аймгийн гурван аварга, заануудыг хэрхэн яаж хаяж, Ерөнхийлөгчийн цомыг өргөсөн талаар нь яриулсаар байгаа харагдана.
Хамгийн сүүлд гэхэд Малчин телевизийн Гарьд магнай нэвтрүүлэгт Д.Амарсайхан начин уригдаж ороод барилдааныхаа талаар нээлттэй сайхан ярилцжээ. Энэ үеэрээ тэрбээр "Олон хэвлэл мэдээлэлд ярилцлага өглөө. Одоо айгаад санаа зовоод байна. Хамаагүй, нөгөө Ховдын гурвыгаа хаяж унагаснаа энд тэнд ярьж явж байгаад нөгөө гурвынхаа уурыг хүргэвэл яана аа. Нөгөө гурав маань ээлжлээд бөхийн барилдаан дээр гурвын даваан дээр ам аваад байвал яана. Тэгвэл тэгээд миний бөхийн карьер дуусна шүү" гэж эмээсэн аястай ярилцлага өгчээ.
