УИХ-ын нэгдсэн чуулганы хуралдаанаар Хөрөнгө оруулалтын тухай хуулийн шинэчилсэн найруулгын тухай хуулийн төслийг хэлэлцэх үеэр УИХ-ын гишүүн, Эдийн засаг хөгжлийн сайд Ч.Хүрэлбаатар “Хөрөнгө оруулалтын тухай хуулийн шинэчилсэн найруулгыг боловсруулахдаа бид олон удаа хэлэлцүүлэг өрнүүлсэн. Хөрөнгө оруулахад юу саад болоод байна вэ, орж ирсэн хөрөнгө оруулагч яагаад гараад явж байна вэ, гадаадын хөрөнгө оруулалттай аж ахуйн нэгжийн тоо яагаад цөөрөөд байна вэ гэдгийг нэлээн сайн судалж үзсэн.
Бүртгэл, зөвшөөрөл авах, шүүхэд хандах, шүүхээр асуудлаа шийдвэрлүүлэх гээд бүхий л газарт нь асуудал үүсдэг. Засгийн газарт хөрөнгө оруулагчдын гомдлыг авч, хэлэлцдэг болж эхэлсэн юм. Одоогийн байдлаар 69 аж ахуйн нэгж гомдол мэдүүлсэн байна. Үүнээс үзэхэд манай хуулийн байгууллагын зарим хүмүүс нийлж байгаад хүний бизнесийг булаах тохиолдол ч байна. Хуулиар шаардах ёсгүй зүйлийг шаарддаг, нэхдэг. Зарим лицензийг нь хүчингүй болгуулж, өөрсдөө авдаг. Хар тамхи гэрт нь аваачиж нуучихаад тэрийг нь илрүүлээд хөөж гаргадаг. Хөрөнгийг нь дээрэмддэг зүйлүүд гараад байгаа учраас энэ улсад хөрөнгө оруулалт орж ирэхгүй байгаа юм. Энэ бүгдийг засъя гэж энэ хуулийг оруулж ирж байна” гэсэн мэдээлэл өглөө.
