УИХ-ын чуулганы өнөөдрийн хуралдаан Хөрөнгө оруулалтын тухай хуулийн хэлэлцүүлгээр үргэлжилж байна. Хуультай холбогдуулан гишүүд асуулт асууж хариулт авч байна. БХБ-ын сайд Ц.Даваасүрэнгийн асуултад Эдийн засгийн хөгжлийн сайд Ч.Хүрэлбаатар хариулт өглөө.
Тэрбээр "Даваасүрэн гишүүн та дандаа мушгиж яриад байна. Би Гадаадын хөрөнгө оруулалтын тухай хууль оруулж ирж байгаа юм. Гадаадын иргэний эрхзүйн байдлын тухай хуульд өөрчлөлт оруулж ирээгүй. Таны яриад байгаа зүйл хуулиараа зохицуулагдаад явж байгаа. Худлаа ингэж мушгиж болохгүй. Юм болгоныг хаана, бооно гэсэн коммунист сэтгэлгээ чинь Монгол Улсыг хаашаа аваачих болдоо. Бид нар Монгол Улсад аль болохоор эрх чөлөөтэй бодлогоо зөв явуулж байж хөгжинө. Түүнээс худлаа ингэж хоолойгоо шахаж, бизнесийн орчныг хааж, бизнес эрхлэгчдэд юу хийхийг нь зааж өгнө гэсэн сэтгэхүй чинь Монгол Улсын хорлоно шүү. Би Монголынхоо залуус, бизнес эрхлэгчдэд итгэж байгаа. Энэ хүмүүсийн бизнес хийх эрх чөлөөг нь нээж өгөх хэрэгтэй" гэв.
