Сэтгүүлч Н.Өнөрцэцэг хорих 461 дүгээр ангид цагдан хоригдоод сар болоод байна. Түүний ар гэрийнхэн өнөөдөр /2024.01.03/ сэтгүүлчдэд хандлаа.
Дүү Н.Амгаланбаяр: Миний эгч 2023 оны 12 дугаар сарын 04-нд цагдан хоригдох 461-р ангид хоригдсон. Өнөөдөр уг нь суллах өдөр нь байлаа. Өнгөрсөн хугацаанд суллах эсэх шүүх хурал 10 удаа болоод шүүхээс суллахгүй гэдэг шийдвэр гарсан. Үүн дээр бид их гайхаж, эргэлзэж байна. Эрүүгийн хуулийн 13-ын 14-р зүйл заалтад гадуур шалгах, хилийн хориг тавих боломжтой гэж хуульчид ярьсан. Энэ заалтыг зөрчөөд дахин сараар хорих шийдвэр гаргалаа. Бага хүү нь ээж утсаар ярихгүй байна гээд шөнө ч унтахаа больсон. Аавынх нь бие өвдөөд эмчлүүлэхээр гадаад явсан. Тэр хоёр хүүхэд хэцүүдэж байна. Аавын маань даралт 180-аас буухаа больсон. Миний эгч өчнөөн хүнд тус дэм болж явсан. Эгчийг минь гадуур шалгаж өгөөч гэж холбогдох хүмүүсээс чин сэтгэлээсээ гуйж байна.
Эгч Н.Өнөрбаяр: Намайг цагдаагаас дуудаад хотод байдаг байрыг маань хөдөө байж яах гэж авсан. Ямар мөнгөөр авсан гэж асуусан. Малчин хүн хотод байр авч болохгүй юу. Малчин хүн гэхээр л айлын хашаанд гэр барьж хүүхдүүдээ сургуульд явуулдаг байх ёстой юу. Бид нар бүгд хөдөө амьдардаг. Долоо хоноод л дүүтэйгээ уулзах гээд ирэхээр уулзалтын бичгийг нь гаргаж өгдөггүй. Долоо хоногийн хоёр удаа өгөх ёстой, өглөө есөн цаг гээд очихоор хуралд орчихсон байна. Эсвэл дээрээс тамга дараагүй байна гэдэг. Алтанбулаг руу цас ихтэй машин явахад тун хэцүү, арай хийж ирээд л уулзах гэхээр бичиг нь гарахгүй. Хэцүү байна, энэ асуудлыг анхаараад өгөөч. Дүүгийнхээ үгийг нэг сонсоод, уулзая гэхээр бичиг нь гардаггүй. Өдрийн бүтэн хүлээлгээд л байдаггүй, үүдэнд нь хүлээгээд суугаад л байдаг. Миний дүүг гадуур шалгаж өгөөч, онц ноцтой гэмт хэрэг хийгээгүй шүү дээ. Хоёр хүү нь үнэхээр хэцүү байгаа. Бага хүү нь гурван цагаас нааш унтахгүй. Миний ээж аль хөдөө явсан юм аниа, фэйсбүүкээр яримаар байна гээд маш хэцүү байна. Хүнлэг энэрэнгүй Ардчилсан улс гэдэг. Гэхдээ дүүг минь хорьсонд үнэхээр гомдолтой байна. Дүүг маань гадуур шалгаад өгөөч гэж гуймаар байна. Тролл баг гэж үнэхээр аймаар ажилладаг юм билээ.
Манай дүү өөрөө их нээлттэй хүн .Хуулиараа 30 хоногийн баривчилгаа нь дуусч байгаа. Гэтэл өмгөөлөгчгүйгээр шүүх хуралдаад хорих хугацааг нь сараар сунгасан. Бидний хувьд дулаан гэрт байснаас талбай дээр гараад суумаар байна. Миний дүү хоригдох хэмжээний хэрэг хийгээгүй гэж бодож байна. Өөрөө сэтгэл санааны хувьд үнэхээр хүнд байгаа.