Өнгөрөгч арванхоёрдугаао сарын 07-нд болсон “Ургацын баяр-2023” улс, аймгийн алдар цолтой хүчит 128 бөхийн барилдааны хоёрын даваанд Улсын заан Б.Серик сумын заан А.Тодмагнайтай барилдаж, давсныхаа дараа гаргасан үйлдэл нь цахим орчинд олон нийтийн шүүмжлэлийг дагуулсан юм. Тэрбээр сумын заан А.Тодмагнайг өвдөг шороодуулсныхаа дараа шанаан дээр нь дарж боссон. Үүнийг бөхийн барилдааны дүрмийн дагуу зөрчил хэмээн үзэж Монголын Үндэсний бөхийн холбооноос Улсын заан Б.Серикийн барилдах эрхийг нэг жилээр хассан.
Харин уг шийдвэрт иргэд шүүмжлэлтэй хандаж байсан.
Тэгвэл түүний барилдах эрхийг дээр заасан хугацаанаас өмнө сэргээх эсэх асуудал яригдаж эхэлжээ. Учир нь түүнийг сүүлийн зургаан барилдаанд туслах хөлийн цэцээр ажилласны дараа барилдах эрхийг нь сэргээх асуудлаар ёс зүйн зөвлөл хуралдахаар болжээ.
Үүнээс харбал Улсын заан Б.Серикийн барилдах эрхийг энэ сарын дундуур буцааж сэргээх магадлал өндөр байгаа юм.
