Сирийн нийслэл Дамаск хотод хийсэн Израилийн агаарын цохилтод Ираны Исламын хувьсгалын гвардийн корпусын (IRGC) ахлах ажилтан, генерал Саид Реза Мусави амь үрэгдсэн гэж Ираны эрх баригчид мэдэгдэв.
Ираны албан ёсны Tasnim мэдээллийн агентлаг Мусавиг Исламын хувьсгалын гвардийн корпусын "туршлагатай цэргийн зөвлөх" байсан гэж мэдэгджээ. Тэрээр Дамаскийн зүүн өмнөд бүс нутагт агаарын цохилт өгөх үеэр нас баржээ.
"Израилийн дэглэм энэ гэмт хэргийнхээ төлөөсийг төлөх нь гарцаагүй" гэж IRGC мэдэгдэлд дурджээ. Израилийн эрх баригчид Мусавигийн үхлийн талаарх мэдээлэлд тайлбар хийгээгүй бөгөөд тэд Израилийн нутаг дэвсгэрээс гадуурх үйл ажиллагааныхаа талаар ихэвчлэн мэдээлэл өгдөггүй.
Израилийн арми Сири дэх Ирантай холбоотой объектуудад цохилт өгдөг байсан бөгөөд Израиль болон ХАМАС-ын хооронд дайн эхэлснээс хойш ийм халдлага байнга гарах болсон.
2011 оноос хойш үргэлжилж буй иргэний дайн эхэлснээс хойш Ираны цэргүүд Сирид байрлаж байгаа бөгөөд тэд Башар аль-Асадын дэглэмийг дэмждэг.
Мусави нь 2020 онд АНУ-ын агаарын цохилтын үеэр Иракт амь үрэгдсэн Исламын хувьсгалын гвардийн корпусын командлагч Кассем Солейманитай нягт хамтран ажиллаж байсан гэх мэдээлэл бий.
Мусави нь Сири дэх IRGC-ийн хамгийн өндөр албан тушаалтнуудын нэг байсан бөгөөд Тегеран, Дамаскийн хамтын ажиллагааг зохицуулахад гол үүрэгтэй оролцдог байжээ.
Эх сурвалж: ВВС