Хамгаалалтын захиргаанд 2023 оны 10 дугаар сарын 27-28 нд шилжих шөнө нийтийн эзэмшлийн авто замыг хааж бетонон хаалт тавьж гарц хаасан гэх гомдлын дагуу Зайсангийн амны газар ашиглагч аж ахуйн нэгжүүдтэй хамтран бетонон хаалтыг холдуулж зам талбайг нээж буруутай этгээдийг илрүүлэн, шаардлага хүргүүлж ажиллаж байна. 2. Богдхан уулын Нүхтийн амны оршин суугч, иргэн Ө.Алтанзаяа, Н.Лхамсүрэн болон Эрдэнэбулган нарын гаргасан гомдлоор Богдхан уулын Нүхтийн аманд баригдсан "Грийн арт" хотхоны орчинд тойронд орц гарцыг нээх, нийтийн эзэмшлийн зам талбайн ашиглалттай холбоотой асуудлаар тухайн орчны оршин суугчид, СӨХ-ын ашиглалтын алба, Хан-Уул дүүргийн 23-р хорооны Хороо, Цагдаагийн хэсгийн төлөөлөгч нарыг хамруулсан уулзалтыг Хамгаалалтын захиргаанаас 2023 оны 10 дугаар сарын 26-ны өдөр газар дээр нь зохион байгуулсан. 
Уулзалтаас тухайн орчинд газар ашиглагч "С..." ХХК нь газар ашиглалтын зөрчөлтэй байгаа нь тогтоогдсон бөгөөд илүү талбайн ашиглалтын зөрчлийг арилгах, албадан буулгах ажлыг 2023.10.27-ны өдөр Хамгаалалтын захиргаа болон Байгаль орчны хяналтын Улсын байцаагчийн хяналтан дор хийж гүйцэтгэж иргэдийн гомдлыг барагдууллаа. 3. Богдхан уулын Бумбатын аманд мод тарих гэрээний хугацаа дууссан "С..." ТББ модны талбай дээрээ зөвшөөрөлгүйгээр барилгын суурь ухаж, хүлэмж барих гэж байсныг зогсоож Улсын байцаагч хяналт шалгалтын ажил явуулж байна. Газар ашиглагч иргэн, аж ахуйн нэгжүүдэд: 
Газрын тухай хуулийн 35 дугаар зүйлийн 35.3.1-д “газар эзэмших гэрээнд заасан нөхцөл, болзлыг биелүүлэх”, 35.3.2-т “газрыг үр ашигтай, зохистой ашиглах, хамгаалах, байгаль орчныг хамгаалах тухай хууль тогтоомж болон төрийн эрх бүхий байгууллагаас газар ашиглалттай холбогдуулан тавьсан нийтлэг шаардлагыг биелүүлэх” Тусгай хамгаалалттай газар нутгийн тухай хуулийн 30 дугаар зүйлийн 30.7-д заасан “зөвшөөрөгдсөн бүс дэх сууринг тохижуулах, барилга байгууламж барих ажлыг батлагдсан төлөвлөгөөний дагуу гүйцэтгэж байгаад хяналт тавих” тус тус заалтуудыг мөрдөж ажиллахыг анхааруулж байна.
