Орос-Украины дайн дэлхийн улс орнуудыг хөдөлгөөнд оруулав. Эндээс л удирдагч хүний зангараг, ухаан, мэдрэмж харагдана. МАНайх шиг "шатахуун нийлүүлэхээ больчихно" гэж айж суугаа орон алга. Бүгд боломжийг ашиглан зогсолтгүй төрийн айлчлал хийж байна. Казахстаны Ерөнхийлөгч К.Токаев нь хамгийн түрүүнд Турктэй $10 тэрбумын түүхэн гэрээ байгуулав. Н.Назарбаевын үед тус улс уул уурхайд суурилсан хамгийн муу загвартай (түүхий эдээ боловсруулдаггүй түүхийгээр нь зардаг) байв. Харин одоо улстөр, эдийн засгийн реформ зоригтой хийж эхэлсэн.
Казахстаны эрх баригчид гадны хөрөнгө оруулагчдад бизнесийн таатай орчин санал болгон, тэдний үйл ажиллагааг тууштай дэмжиж эхэлсэн. Хөрөнгө оруулагчдын шаардсан олон улсын стандарт бүрийг дэмжив. Цар тахал, дайны үед тус улс руу чиглэсэн гадаадын хөрөнгө оруулалт түүхэн дээд хэмжээнд хүрсэн нь гайхалтай.
Одоо Ерөнхийлөгч К.Токаев 5-р сарын 26-нд Киргизстан Улсад айлчлах гэж байна. Түүний гадаад нөхцөл байдлыг шуурхай мэдэрч, хөдөлж буй нь гайхалтай. Түүхэн боломжоо эрх мэдэлтэй цаг үедээ тултал ашиглаж байна. Оросууд хил залгадаггүй тул Киргизстаныг Казахстанаар дамжуулан "дээрэлхэж" ирсэн. Гэтэл К.Токаев том тоглогч гэдгээ харуулан Оросын нөлөөллийг олон салбарт бууруулав.
К.Токаев бол улсаа төлөөлөн НҮБ-д 4 жил ажилласан туршлагатай дипломатч юм. Тэр 5 орны хэлээр чөлөөтэй ярьдаг. ОХУ-ын эрх баригчид дайн хийгээд сөхөөгүй байхад нь асар шуурхай арга хэмжээнүүдийг улстөр, эдийн засагтаа шат дараатай авч чадлаа. Үүнийгээ зогсоохгүй гэдгээ ч дараа дараагийн айлчлалуудаар харуулж байна.
Ер нь дэлхий дээр МАНайх шиг зүгээр сууж байгаа улс орон алга. Бидэнд ч бас эдийн засгийн нөлөөллөө бууруулах боломж бий. Бүгд хойд хөршөө харсан хүмүүжилтэй биш бол тусгаар тогтносон улс гэдгээ нотлох учиртай. Дайныг ил тод эсэргүүцэж чаддаггүй юм гэхэд 3-дагч хөршийн бодлогоо тууштай зарлах хэрэгтэй. НҮБ-ын 141 орон ардчилал, үнэт зүйлээрээ нэгдэн ОХУ-ын эсрэг зогссон. Дэлхийн нийт эдийн засгийн 70% тэнд байна. Монгол Улс энэ талд л чирэгдэн, зүүгдэх ёстой. Энэ өдрүүдэд АНУ-ын ерөнхийлөгч Ж.Байден Азийн улс орнуудаар зориуд айлчилж байна.