Дундговь: ОХУ-аас Монгол улсын нутаг дэвсгэрээр дамжуулан БНХАУ-руу байгалийн хий хоолой татах төслийн баг Дундговь аймгийн удирдлагуудтай уулзаж төслөө танилцууллаа.
Төслийг “Газопровод Союз Восток” ХХК гүйцэтгэж байгаа бөгөөд уулзалтын үеэр төслийн инженерийн судалгаа гүйцэтгэх зөвшөөрөл олгох, хий дамжуулах хоолойн ойролцоо орших нэгж талбаруудын эзэмшлийн болон зориулалтын талаарх мэдээлэл өгөх, дээрх ажлын зураг төсөл, судалгааны ажил гүйцэтгэх болон барилгын ажил гүйцэтгэхэд хамтран ажиллах хариуцлагатай албан тушаалтныг орон нутгийн төрийн захиргааны байгууллагуудаас тодорхойлох зэрэг асуудлыг хэлэлцэн шийдвэрлэжээ.
Байгалийн хий дамжуулах хоолой нь Монгол улсын нутаг дэвсгэрээр дамжин өнгөрөх 957 км үргэлжлэх бөгөөд манай аймгийн Цагаандэлгэр сумын 36,2 км нутаг дэвсгэрээр дайран өнгөрөх юм.
Уулзалтанд Дундговь аймгаас Засаг дарга Ц.Мөнхбат, ИТХ-ын нарийн бичгийн дарга Ш.Энхсүх болон Цагаандэлгэр сумын удирдлагууд, холбогдох албаны хүмүүс оролцсон байна.
