АНУ-ын Үндсэн хуульд "бослого" үйлдсэн албан тушаалтныг төрийн албан тушаал хашихыг хориглосон заалтыг үндэслэн Колорадо мужийн Дээд шүүх ерөнхийлөгч асан Дональд Трампыг 2024 оны ерөнхийлөгчийн сонгуульд нэр дэвших эрхийг нь хасах шийдвэр гаргажээ.
2021 оны нэгдүгээр сарын 6-нд Трампыг дэмжигчид Капитол Хилл дэх Конгрессийн ордон руу дайран орж, түүний өрсөлдөгч Жо Байден ялалт байгуулсан Ерөнхийлөгчийн сонгуулийн үр дүнг эсэргүүцэхийг оролдсон үйл явдалд Донөльд Трампыг буруутай гэх үндэслэлээр ийм шийдвэрийг гаргажээ.
Гэвч энэхүү шийдвэрийн хүчин төгөлдөр болох хугацааг 2024 оны 1-р сарын 4 хүртэл түр зогсоосон тул АНУ-ын Дээд шүүх үүнийг эсэргүүцсэн давж заалдах гомдлыг авч үзэх боломжтой болж байна.
Тэгээд ч Трампын багийнхан болон дэмжигчид шүүхийн шийдвэрийг бүрэн үндэслэлгүй, ардчилсан бус гэж нэрлээд, АНУ-ын Дээд шүүхэд давж заалдана гэдгээ мэдэгдээд байна.
Трампын өмгөөлөгч Капитол дахь үймээн самууныг бослого гэж үзэх хангалттай үндэслэл байхгүй бөгөөд тэр өдөр Трамп Вашингтон дахь дэмжигчиддээ хандаж хэлсэн үг нь түүний үг хэлэх эрхээр хамгаалагдсан гэж маргажээ. Шүүх Трампыг саналын хуудаснаас хасахыг шаардах эрхгүй гэж өмгөөлөгч маргаан үүсгээд байна.
Өнгөрөгч мягмар гарагт гарсан Дээд шүүхийн шийдвэр нь зөвхөн Колорадо мужид гуравдугаар сарын 5-нд болох Бүгд найрамдах намын анхан шатны сонгуульд хамаарах бөгөөд Колорадо мужаас бусад мужуудад хамаарахгүй. Гэсэн хэдий ч энэ нь арваннэгдүгээр сарын 5-нд болох бүх нийтийн сонгуульд Трампын нэр хүндэд нөлөөлж болзошгүй юм.
Эх сурвалж: ВВС