Улсын Их Хурлын Хянан шалгах түр хорооноос зохион байгуулж буй Нүүрсний гэх тодотголтой нотлох баримтыг шинжлэн судлах нээлттэй сонсгол өнөөдөр (2023.12.21) дөрөв дэх өдрөө үргэлжилнэ. Өнөөдөр “Эрдэнэс тавантолгой” ХК-иас санхүүжүүлсэн төмөр замын төслүүдийн талаарх 7 асуудлаар нотлох баримтуудыг шинжлэн судална.
Сонсголд Монгол Улсын Ерөнхийлөгч асан Х.Баттулга, ЗТХ-ийн дэд сайд Л.Халтар, ЗТХ-ийн сайд асан Б.Энх-Амгалан, "Бодь групп" ТУЗ-ийн дарга Б.Баясгалан, "Бодь интернейшнл" ХХК-ийн гүйцэтгэх захирал асан А.Амундара нар гэрчээр оролцох ёстой.
Улсын Их Хурлын 11 гишүүний бүрэлдэхүүнтэй тус нотлох баримтыг шинжлэн судлах сонсголоор өнөөдөр “Эрдэнэс тавантолгой” ХК-иас санхүүжүүлсэн төмөр замын төслүүд сэдвийн хүрээнд дараах 7 асуудлаар нотлох баримтыг шинжлэн судлах бөгөөд энэ хүрээнд 68 гэрчийг дуудсан байна.
1) Тавантолгой-Зүүнбаян чиглэлийн төмөр замын төсөл
2) Богдхан төмөр зам
3) Бодь Интернэшнл ХХК /Богдхан төмөр замын санхүүжилт/
4) Тавантолгой-Гашуунсухайт чиглэлийн төмөр замын төсөл
5) Тавантолгойн нүүрс ачих логистикийн төв
6) ТТ-ГС болон ТТ-ЗБ холбох төмөр зам
7) Бодь Интернэшнл ХХК /ТТ-ГС төмөр замын санхүүжилт/
Хянан шалгах түр хорооны даргын урилгаар сонсголд АТГ, Улсын Ерөнхий прокурорын газрын Хэрэг бүртгэх мөрдөн байцаах ажиллагаанд хяналт тавих хэлтэс, Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих 2 дугаар хэлтэс, Эрүүгийн цагдаагийн албаны Эдийн засгийн гэмт хэрэгтэй тэмцэх газар, тус газрын Мөрдөн шалгах хэлтсийн удирдлага, холбогдон албан тушаалтнууд оролцож байгаа юм.
