Нүүрсний сонсголын хоёрдахь шатны сонсголоор 5,2 сая тонн нүүрсийг гаалийн бүрдүүлэлтгүй гаргасан байж болзошгүй нөхцөл байдал илэрсэн байна. Энэ нь 5 тэрбум орчим ам.доллар гэсэн үг. Гаалийн бүрдүүлэлтгүй их хэмжээний нүүрс гаргасан компаниудад хамаарал бүхий улстөрчийн жагсаалтыг УИХ-ын гишүүн Ш.Адьшаа, А.Адъяасүрэн нар тэргүүлсэн учраас сонсголд гэрчээр дуудагдан оролцов.
УИХ-ын гишүүн А.Адъяасүрэн: Өнөөдрийг хүртэл би чимээгүй явж ирсэн. Одоо үгээ хэлэх цагаа болсон байх. 2020 он хүртэл Адъяасүрэн гэдэг хүнийг хэн ч танихгүй байсан. Гэтэл сонгуульд өрсөлдөх сургаар надтай холбоотой элдэв гүтгэлэг гарч байсан.
Манай эгч нэг хүнд зээл өгсөн асуудлыг намайг бусдад хахууль өгсөн мэтээр хэрэг үүсгэж, шалгаж, элдвээр харлуулсан. Шалгагдаад хэрэгсэхгүй болгосон ч 2022 онд дахин сэргээж, шалгах болсон. Миний хувьд хамаарал бүхий хэмээн нэр дурдагдсан компаниудаас ганц л компанийг мэдэж байна. Бусдыг нь огт мэдэхгүй. Оффшор бүс, турк эзэнтэй болсон гэдгийг би огт мэдэхгүй байна.
ХЗДХ-ийн сайд Б.Энхбаяр: Таны хахууль өгсөн гэх Автотээврийн үндэсний тээврийн Доржпалам гэх хүний хэрэг шүүх дээр яваа. Энэ хүн чинь хахууль авсан гээд шүүгдэж байхад хахууль өгсөн хүн нь алга.
УИХ-ын гишүүн А.Адъяасүрэн: Манай өмгөөлөгч хариулт өгнө.
Өмгөөлөгч Батжаргал: 2020 онд энэ асуудал үүссэн. Шалгалт, үзлэг хийсэн. Байцаалт ч авсан. Миний үйлчлүүлч А.Адъяасүрэнгийн хувьд нэг л мэдүүлэг өгсөн. Доржпалам гэж хүн удаа дараа надаас мөнгө тусламж хүссэн боловч надад боломж байгаагүй учраас Аюуш гэж хүнтэй холбож өгсөн. Ингээд тэд зээлийн харилцаанд орсон байдаг. Бидний зүгээс удаа дараа хуулийн байгууллагад асуудал тавьсан боловч өнөөдрийн байдлаар ямар ч хариу алга.
УИХ-ын гишүүн А.Адъяасүрэн: Та нар буруу газраас хулгайчаа хайгаад байна. Нүүрс тээврийн компани хулгай хийх ямар ч боломжгүй. Нүүрсээ А цэгээс жинлээд Б цэгт хүргэхдээ жинлээд өгдөг юм.
