Хотын дарга Х.Нямбаатар:
-Сүүлийн үед агаарын температур огцом хүйтэрч байгаатай холбогдуулан хэд хэдэн арга хэмжээг зайлшгүй авах шаардлага үүсч байна. Цаг уурын байгууллагын мэдээллээр арванхоёрдугаар сарын 13-ны өдрөөс эхэлж, Сибирийн агаарын хүйтэн урсгал Монгол орны нийт нутаг дэвсгэрээр дайран өнгөрч байна. Энэ цаг уурын байдал энэ сарын 20-ноос хойш үргэлжлэх төлөвтэй байна. Хөрсөн дээр -40 хэм давж, цочир хүйтэрч байна. БШУ-ны сайдын тушаал гарч улс даяар ЕБС-ийн хичээл сургалтын горимд өөрчлөлтийг оруулж байна. Тодруулбал, маргаашаас буюу 2023 оны арванхоёрдугаар сарын 18-наас эхлэн 1-5 дугаар ангийн сурагчдын хичээлийг цахимд шилжүүлж байна. Арванхоёрдугаар сарын 25-наас эхлэн 6-12 дугаар ангийн сурагчид цахимаар хичээллэнэ. Тэгээд арванхоёрдугаар сарын 28-наас эхлэн бүх ЕБС-ийн улирлын амралт эхэлнэ.Мөн нийслэлийн Засаг даргын захирамжаар арванхоёрдугаар сарын 18-наас эхлэн 2024 оны хоёрдугаар сарын 1-нийг хүртэл автомашины дугаарыг тэгш, сондгойгоор зорчуулна. Тэгш, сондгой горимоор явах зохицуулалтын талаар цагдаагийн байгууллагаас дэлгэрэнгүй мэдээлэл өгнө.Өнгөрсөн хоногуудад шөнө, өглөө, өдөр гэсэн хуваарьтайгаар зам дээр давс цацаж байгаа боловч -40 хэм давж хүйтэрч байгаа учраас үйлчлэл нь гарахгүй байна. Хот тохижилтын ажилчдыг хайрга дайрга давс зэрэгцүүлж цацах үүрэг өгсөн. Гулгаа арилахгүй хэт их хүйтэн байгаа учраас машины хурд эрс саарч, түгжрэлийг үүсгэж байна. Ийм зохицуулалтыг авахаас өөр арга алга. Цочир хүйтрэлийн үед авах онцгой арга хэмжээний төлөвлөгөөгүй ажиллаж байгаа. Ойрын хугацаанд ийм төлөвлөгөөг танилцуулж, иргэдэд заавал урьдчилан танилцуулна.
Нийслэлийн цагдаагийн газрын дарга О.Ганбат:-Бид нарийвчилсан тооцоо судалгаагаа хийж байна. Саппорогийн уулзвараас Офицерийн ордон, Зүүн дөрвөн замын уулзвар хүртэл автомашины дугаарыг хязгаарладаг байсан бол энэ удаагийн хязгаарлалтыг арай томсгосон хэлбэрээр зохион байгуулахаар ярьсан. Нарийн тооцоо одоо гараагүй учраас ингэж бүсчилнэ гэж ярихад хэцүү байна. Сонсголын уулзвараас Офицерийн ордон хүртэл зүүн баруун чиглэлийн бүсчлэлийг тогтоож, Зуун айлын хойд хэсэг 32-ын тойргоос урагшаа Маршлын гүүрний хойд хэсэг хүртэл томсгох шийдвэрийг гаргалаа. Удахгүй албажна. Тэгш, сондгой дугаарын хязгаарлалт нь давс бодис үйлчлэхгүй, машины хөдөлгөөн удааширч, маш их түгжрэл үүсгэж байна. Цаашдаа нийтийн тээврийн хүртээмж нэмэгдэхээр зорчих хэсгийн нэгдүгээр эгнээг тодорхой хэсэгт чөлөөлөх ажлыг хийнэ.
