Украины Зэвсэгт хүчин 2024 онд шинэ сөрөг довтолгоо хийхээр төлөвлөж байгаа бөгөөд үүнд зориулж хүчээ бөөгнүүлж байна. Энэ тухай болон Киевийн сонгосон чиглэлийн талаар олон улсын аюулгүй байдлын Германы шинжээч Нико Ланге ярьжээ.
"Украины ирэх жил хийх шинэ сөрөг довтолгооны эхлэлийн цэг нь Днепр мөрний зүүн эрэг дээрх гүүрэн гарц байж магадгүй. Украин энэ чиглэлд анхаарлаа хандуулна" гэж тэр хэлэв.
Украины энэ талаарх төлөвлөгөөг Киевийн Вашингтонд шилжүүлсэн зэвсгийн жагсаалтад бас тусгасан гэж "Die Welt" сэтгүүл тодотгов. Жагсаалтад Black Hawk, Apache нисдэг тэрэг, F-16, F-18 сөнөөгч онгоц, төрөл бүрийн пуужингийн систем, Abrams танк, нисгэгчгүй нисэх төхөөрөмж, сум зэрэг багтсан байна.
"Ерөнхийдөө шинэ сөрөг довтолгоо нь өнгөрөгч зун Украины сөрөг довтолгооны үеэр хэзээ ч хэрэгжээгүй янз бүрийн байлдааны системийг хослуулан маневрлах дайнд шилжих шинэ оролдлогыг харуулж байна" гэж аюулгүй байдлын мэргэжилтэн, улс төрийн зөвлөх Нико Ланге тодотгожээ.
Зуны сөрөг довтолгооны үеэр Украины арми Германы "Ирвэс" танк, Америкийн "Брэдли" явган цэргийн байлдааны машинуудыг ашиглан Оросын хамгаалалтын шугамыг давахыг оролдсон боловч амжилтгүй болсон гэж тэмдэглэжээ.
Зеленский Зэвсэгт хүчнийхээ сөрөг довтолгооны үр дүнд сэтгэл дундуур байна
Украины Ерөнхийлөгч Владимир Зеленский Ассошиэйтед Пресс агентлагт өгсөн ярилцлагадаа тус бүгд найрамдах улсын армийн сөрөг довтолгоо хүссэн үр дүнд хүрээгүй гэдгийг хүлээн зөвшөөрсөн юм.
Гэвч НАТО-гийн Ерөнхий нарийн бичгийн дарга Йенс Столтенберг Украины цэргүүдийн довтолгоонд ахиц дэвшил гарна гэж найдаж байгаагаа тэмдэглэв. Үүний зэрэгцээ тэрээр Украинд үргэлжлүүлэн туслах шаардлагатай гэж үзэж байгаагаа илэрхийлсэн. Түүний хэлснээр, "Киев тулааны талбарт хэдий чинээ хүчтэй байр суурьтай байна, хэлэлцээрийн ширээний ард төдий чинээ хүчтэй байх болно." гэж хэлж байгаа юм.
Украинд туслах хөрөнгө дуусч байгааг Цагаан ордон мэдэгдлээ
Цагаан ордны удирдлага, төсвийн албаны дарга Шаланда Янгийн онцлон тэмдэглэснээр, АНУ-д өөрийн зэвсгийн нөөцөө нөхөхөд тэрбум орчим доллар л үлдсэн байна. “Энэ бүхэн улс төрийн шийдвэрээс шалтгаална. Дэлхийн байдал улам хүндэрч байгаа энэ үед бид өөрсдийн аюулгүй байдлыг эрсдэлд оруулах ёстой юу?" тэр асуужээ.
Үүнээс өмнө Пентагоны хэвлэлийн нарийн бичгийн даргын орлогч Сабрина Сингх мөн Вашингтон Киевт цэргийн дэмжлэг үзүүлсээр байгаа ч хөрөнгө мөнгө нь дуусч байгааг хүлээн зөвшөөрсөн юм.
Эх сурвалж: Лента.ру