Х.Нямбаатарыг “Миний дүү битгий, хүн амьтны утсан хүүхэлдэй болоод яваад бай” гэж УИХ-ын гишүүн Ц.Даваасүрэн шүүмжлэхэд, түүнийг нь дамжуулсан сэтгүүлчийг цагдаад өгч торгуулж байв, манай Хууль зүй, дотоод хэргийн сайд.
Шүүмжлэлд дургүй ч өөрөө сүрхий шүүмжлэгч Х.Нямбаатар сайд саяхан Эрүүгийн хуульд нэмэлт өөрчлөлт оруулах хуулийн төслөө өргөн барьсан.
Тэр Эрүүгийн хуулийн 13.14 дэх хэсгээс “илт” гэдэг үгийг хасах гэж байгаа юм байна. Өөрөөр хэлбэл, таны нийгмийн сүлжээний бичсэн сэтгэгдэл, жиргээ, хурал, зөвлөгөөн дээр хэлсэн үг, групп чат, олны дунд хэлсэн үг нотлогдохгүй, худлаа байвал та ялтан болно. “Илт худал” буюу оргүй худлаа байх албагүй. Давсалсан, хачирласан, хүч нэмсэн, эмоци орсон үгэндээ та ороогдож шоронгийн хаалга татах нь ээ. Хүн бүр үгээ цэнэдэг, чин үнэнээ гэрчлэн мэдүүлдэг, хатуу үг нэгэндээ хэлдэггүй, шүүмжлэлээс тас ангид нийгэм рүү Х.Нямбаатар сайд биднийг чирэх гэж байна. За тэр пранкчид бол баяртай болох нь. Илт худал мэдээлэл бол Дээд шүүхийн тайлбартай. Харин "худал мэдээлэл" бол тайлбаргүй буюу цагдаа, хуулийнхан яаж ч хэрэгжүүлж болохоор байна.
Тэр бас иргэд өөрийг нь доромжилж магадгүй хэмээн олон жилийн өмнө хасагдаад мартагдсан “доромжлох” үйлдлийг Эрүүгийн хуулийн төсөлд бичив. Магтаал, долоолтод бялуурч, тойрон хүрээлэгчиддээ вакумжих дуртай дарга нарын үе коммунист нийгэмтэй хоцорсон гэж бодсон юмсан. Засаглалын муудаа ард иргэддээ хараалгахгүйн хамгаалалтыг Эрүүгийн хуулийн тоосгоор өрнө гэж яаж мэдэх вэ. Ингэж амьдруулж, ингэж засаглаж байгаагийнх нь төлөө “п” байтугайгаар доромжилж, зүхмээр байгаа иргэд. Даргыг тэгж доромжилвол эрүүгийн ялтан болох юм байна л даа.
Үнэ нэмэгдэх нь ээ, бараа материал тасалдах нь ээ гэж та фэйсбүүк, твиттэрт бичиж, ялангуяа эдийн засагчид энэ талаар яривал эрүүгийн ялтан болох цаг дөхөж байна. Үүний эхлэл болгож “Үнийн хөөрөгдөл, бараа бүтээгдэхүүний хомсдол үүсэх талаар илтэд худал мэдээлэл тараах” гэмт хэргийг шинээр зүйлчлэхээр өргөн барьжээ.
Монгол Улс хэвлэлийн эрх чөлөөний индексээр ганцхан жилийн дотор 22 байр ухарсны буруу хэнийх вэ. Шуудхан хэлэхэд, иргэдийнхээ үзэл бодлыг, шүүмжлэлийг үргэлж шоронжуулахын төлөө үйлдэл гаргаж байгаа Х.Нямбаатарын хууль зүйн салбарт тарьсан нян бактераас болсон уу гэж иргэдээс асуумаар байна?
Г.Улсболд
Эх сурвалж: Time.mn