Манай улс ОХУ-аас эрчим хүч импортолдог. Гэтэл тус улсын Монголд эрчим хүч нийлүүлдэг нийгэмлэг /"ВЕК" хувьцаат нийгэмлэг/-ээс Диспетчерийн үндэсний төвд өчигдөр мэдэгдэл хүргүүлжээ. Уг мэдэгдэлд, энэ сарын 13-ны өдрөөс эхлээд ОХУ-аас нийлүүлж байгаа цахилгаан эрчим хүчний дээд хэмжээг буюу 345 МВт цахилгаан эрчим хүчийг 150 МВт болгон тодорхой хугацаагүйгээр хязгаарлахаа мэдэгдсэн тухай Эрчим хүчний сайд Б.Чойжилсүрэн мэдээлсэн. Иймд тэрбээр иргэд, ААН-үүд боломж, бололцоогоороо эрчим хүчээ хэмнэхийг уриалав. Гэхдээ ОХУ-ын талаас цахилгаан хязгаарлах хугацааг түр хойшлуулсныг мөн мэдээлсэн.
Эрчим хүчээ хэмнэж хувь нэмрээ оруулах энгийн аргууд бий. Үүнд:
Офисын хүрээнд:
- Эрчим хүчний хэмнэлттэй LED гэрэл суурилуулах,
- Өдрийн цагаар байгалийн гэрэл түлхүү ашиглах,
- Цахилгаан шатны хэрэглээг багасгах,
- Ажлаа тараад гарахдаа компьютероо унтраах, цэнэглэгчийг тэжээлээс залгуураар нь салгах
- Хүн их явдаггүй газруудад хөдөлгөөн мэдрэгчтэй гэрэл суурилуулах гэх мэт энгийн аргуудыг нэрлэж болж байна.
Харин гэрийн нөхцөлд:
- Унтахдаа зурагтаа унтраагаад, гар утсаа цэнэглэгчээс салгах. Залгуураар нь салгахгүй бол тодорхой хэмжээний эрчим хүч зарцуулсаар л байдаг.
- Хэрэглээгүй тохиолдолд уртасгагчаа цахилгаанаас салгаж, гэрлийг унтраах. Залгуурын гэрэл асаалттай тохиолдолд эрчим хүч зарцуулсаар байдаг.
- Эрчим хүчний оргил ачааллын үе 17:00-22:00 цагийн хооронд байдаг. Манай улс оргил ачааллын үеэр гаднаас импортоор эрчим хүч худалдаж авдаг. Иймд цагийн хуваарьт зохицуулалт хийгээд орой 22:00 цагаас хойш угаалгын машин ажиллуулах зэргээр өөрчлөлт оруулбал үр дүнтэй хэмнэлт болно. Өөрөөр хэлбэл ачаалалгүй цагаар цахилгаан хэрэгслээ залгах нь гаднаас импортолж буй цахилгаанд хэмнэлт болно гэсэн үг. Энэ мэт энгийн аргаар цахилгаанаа хэмнэж болно.
