"Эрдэнэс тавантолгой" ХК-ийн гүйцэтгэх захирлаар ажиллаж байхдаа саатуулагдаж, урьдчилан хорих ангид жил гаруй цагдан хоригдож буй Б.Ганхуягийн эрүүл мэндийн асуудалд ноцтой асуудал үүссэн талаар ар гэр нь удаа дараа мэдээлж буй. Өөрөөр хэлбэл Б.Ганхуягийн гэр бүлийнхэн дүүгээ, ахыгаа хүнцэл гэх бодисоор хордуулсан энэ нь аажмаар нөлөөлж биеийн байдал нь муудаж байгаад анхаарал хандуулаач хэмээн хэвлэлийн хурал хийж, холбогдох газруудад хандаж байгаа билээ.
Үүнтэй холбоотой асуудлаар ШШГЕГ-аас тайлбар мэдээлэл өглөө.
ШШГЕГ "Нийгэмд тэнцвэртэй мэдээлэл хүргэх үүднээс бид нар албан ёсны мэдээлэл өгч байна. Өнөөдөр 461 дүгээр ангид 800 гаруй хоригдогч байна. Тэд бүгдээрээ нэг гал тогооноос хоол ундаа хэрэглэдэг. Үндсэндээ энд 800 хүний эрүүл мэнд, аюулгүй байдал яригдаж байгаа учраас та бүхэнд албан ёсны мэдээллийг өгөе гэж бодсон юм. Б.Ганхуягийн хувьд хүнцэл гэж яриад байгаа. Энэ нь хүний биед тодорхой хэмжээгээр зайлшгүй байдаг химийн элемент. Б.Ганхуяг анх 2022 оны арванхоёрдугаар сарын 07-нд цагдан хоригдсон. Үзсэн жижүүр эмчийн тэмдэглэлд биеийн эрүүл мэнд тогтвортой, амин үзүүлэлт хэвийн, хэсэг газрын үзүүлэлтээр бол хоёр хөлийн шилбээр хуучин харшлын сорвитой гэж хүлээж авсан тэмдэглэл үзлэг байдаг.
Б.Ганхуягийг хоригдсон цагаас нь эхлээд хорих ангийн эмнэлгийн хяналтад явж байгаа. Эмнэлэгт гурван удаа хэвтсэн. Хоригдож байх хугацаандаа байнгын өдөр тутмын хяналтын үзлэг хийж байсан. Зургаан удаа лабораторийн шинжилгээнд, гурван удаа багажийн шинжилгээнд хамрагдсан. Одоогийн байдлаар эмгэг өөрчлөлт илрээгүй. Өнөөдрийн байдлаар Б.Ганхуягийн биед илрэх илэрхий зовуурь байхгүй, амин үзүүлэлтүүд нь тогтвортой, шинжилгээнээс гарсан өөрчлөлт байхгүй" гэв.
