Мэдээллийн www.zarig.mn сайтын Монгол Улсаас хандах эрхийг өнөө өглөө хаасан байна. Тус сайтын домэйн нэр рүү хандах эрхийг хаах зохицуулалтыг ШЕЗ-ийн гомдлын дагуу прокурорын зөвшөөрлөөр хаасан гэдгийг Харилцаа холбооны зохицуулах хорооноос 14.00 цагт мэдээлсэн.
Zarig.mn сайтын эрхлэгч, сэтгүүлч Н.Өнөрцэцэгийг хууль хяналтын байгууллага шалгаж байгаа. Гэхдээ мэдээллийн сайтыг нь ямар нэгэн шүүхийн шийдвэргүйгээр хаасан асуудлыг Монголын сэтгүүлчдийн нэгдсэн эвлэл эсэргүүцэж, дуу хоолойгоо нэгтгээд байна. Хэвлэн нийтлэх эрх чөлөөнд халдаж, мэдээллийн хэрэгслийн хандах эрхийг хааж, иргэдийн мэдэх эрхэнд халдаж байна гэж үзэж байна.
Сэтгүүлчид болон хэвлэл мэдээллийн хэрэгслүүд Цахим хөгжил, харилцаа холбооны сайд Н.Учралаас мэдээлэл авахаар яаманд дээр нь цуглахад тэрээр гарч ирж байр сууриа илэрхийлэв.
ЦХХХ-ны сайд Н.Учрал сайд "Үг хэлэх хэвлэн нийтлэх эрх чөлөө бол ардчиллын суурь зарчим, үнэт зүйлс. Миний хувьд хувь хүн талаасаа, УИХ-ын гишүүн талаасаа, улстөрч хүний хувьд амьдралдаа ямар ч сайт, хэвлэл мэдээллийн байгууллагыг эрүү болон иргэний ямар нэгэн гомдол гаргаж байсан түүхгүй. Ардчиллын суурь зарчмыг хамгаалахын талд үргэлж зогсоно.
Н.Өнөрцэцэгийн явуулж байгаа мэдээллүүд, үг болгон надад таалагддаггүй. Гэхдээ би түүний үг хэлэх хэвлэн нийтлэх эрх чөлөөг нь үргэлж хүндэтгэнэ. Амнаас нь гарч байгаа үг болгон таалагдахгүй байна гээд амыг нь боомилно гэсэн асуудал ардчилсан нийгэмд яавч байж болохгүй асуудал. Тиймээс хэвлэн нийтлэх эрх чөлөөний төлөө, ард түмний мэдэх эрхийн төлөө дуу хоолойгоо нэгтгэж байгаа хэвлэлийнхнийг хүндэтгэж байна. Тиймээс гарч ирээд байр сууриа илэрхийлж байна.
Зариг сайтыг хаах асуудлыг манай яаманд албан ёсоор мэдэгдээгүй. Прокурорын байгууллага дүгнэлт ирүүлж, ЦЕГ-аас хүсэлт ирүүлж Харилцаа холбооны зохицуулах хороо нь энэ хоёр байгууллагаас явуулсан шийдвэрийн дагуу хууль биелүүлж ажилласан байна. Хуульд зааснаар ЦЕГ-ын гомдлын дагуу Харилцаа холбооны зохицуулах хороо домэйн нэрийг түдгэлзүүлэх, түр хаах зохицуулалт байдаг. Үүнийгээ л хэрэгжүүлж ажилласан гэж тайлбарласан.
Гэхдээ прокурор болон цагдаагийн байгууллага дээрх шийдвэрийг яагаад Цахим хөгжил, харилцаа холбооны сайд, Засгийн газрын асуудал эрхэлсэн сайдад дуулгаж болоогүй вэ. Би зохицуулах хороо шийдвэрээ гаргасны дараа дуулсан. Тэгэхээр яагаад энэ асуудлыг яамандаа дуулгасангүй вэ гээд хуулиа үзсэн чинь Харилцаа холбооны хуульд "Тусгай зөвшөөрөл эзэмшигч нартай гэрээ байгуулахдаа домэйн нэрийг бүртгэх журмын дагуу байгуулна" гэж заасан байна. Бүртгэх журам нь Харилцаа холбооны зохицуулах хороо хуралдаж шийддэг юм байна. Захиргааны ерөнхий хуулийн дагуу Хууль зүй яаман дээр бүртгүүлсэн журмаар тэгж зохицуулсан. Үүнийгээ хэрэгжүүлсэн гэж тайлбарлаад байна. Цаашид сонгууль дөхсөн энэ үед ийм асуудал дахин гарахыг үгүйсгэхгүй.
Харилцаа холбооны зохицуулах тухай хуульд нэмэлт өөрчлөлт оруулах тухай хуулийн төслийг ирэх хоногт Засгийн газрын хуралдаанд оруулна. Энэ хүрээнд домэйн нэрийг бүртгэх журамд өөрчлөлт оруулна. Шүүхээр гэм буруутай нь тогтоогдоогүй хүнийг хэнийг ч гэм буруутайд тооцож болохгүй гэдэг нэг л зарчим бий. Гэтэл шалгаж байгаа, шалгалт явуулж буй нэрийдлээр сайтуудыг, хэвлэл мэдээллийн байгууллагуудыг хязгаарлаад байвал яах вэ. Цаашид ардчилал байх уу, үгүй юү гэдэг асуудал яригдана. Төр энд анхаарах ёстой. Тиймээс шүүхийн шийдвэр гарсны дараа хязгаарлах хэмжээг авч байх зохицуулалтыг хуульд оруулах, ингэж ажиллах шаардлагыг Харилцаа холбооны зохицуулах хороонд тавина" гэлээ.
Зариг сайтын эрхлэгч Н.Өнөрцэцэг: Шүүхээс Зариг сайтын үйл ажиллагааг хязгаарлаж болохгүй гэдэг шийдвэрийг гаргасан байхад яагаад манай сайтыг хааж байгаа юм бэ. Өнөөдөр Н.Өнөрцэцэг яллагдагч болохоос Зариг сайт яллагдагч биш, Зариг хуулийн байгууллагад шалгагдаагүй ш дээ. Би өөрийнхөө төлөө тэмцэнэ. Зариг.мн сайтыг нээтэл, мөн намайг шалгаж байгаа бүх хэргийг нээлттэй, ил зарлахыг шаардаж Сүхбаатарын талбай дээр суулт зарлана гэлээ.
Тэгвэл ЦЕГ-аас Н.Өнөрцэцэг, Зариг сайттай холбоотой асуудлаар дараах мэдэгдлийг гаргасан байна.
Н.Учрал: Н.Өнөрцэцэгийн үг болгон надад таалагддагүй. Гэхдээ хэвлэн нийтлэх эрх чөлөөг нь ямагт хүндэтгэнэ
